ისაკო დევიძემ შიმშილობა დაიწყო – ამის შესახებ მოძრაობა “ჯიუტი” სოციალურ ქსელში წერს.
მათივე ცნობით, იქამდე, სანამ სამოქალაქო აქტივისტის სახლში ჩხრეკას დაიწყებდნენ, შინაგან საქმეთა სამინისტროს წარმომადგენლები მას ფიზიკურად გაუსწორდნენ.
“ისაკო დევიძის ადვოკატი გამოვიდა. ისაკო თავდაპირველად პოლიციამ სახლთან ახლოს ნახა და ჩასვა მანქანაში, მიიყვანეს სახლში, სადაც შესვლამდე გაუსწორდნენ ფიზიკურად, ეკითხებოდნენ ისეთ კითხვებს, რომელიც დაკავშირებული იყო პროტესტთან და ორგანიზატორებთან და ასე ჩაატარეს ჩხრეკა. ისაკომ შიმშილობა გამოაცხადა. დაკავებულია ადმინისტრაციულით” – წერია განცხადებაში.
ცნობისთვის, დღეს პოლიციამ სამოქალაქო აქტივისტების სახლში საგამოძიებო მოქმედებების ჩატარება დაიწყო. შსს-ს თანამშრომლებმა ნენსი ვოლანდის, ილია ღლონტისა და ისაკო დევიძის სახლები გაჩხრიკეს.
ისაკო დევიძე დააკავეს, ხოლო ილია ღლონტი დიღმის სამმართველოში გადაიყვანეს. შსს-ს ინფორმაციით, ისაკო დევიძე ადმინისტრაციული წესით არის დაკავებული.
ასევე ვრცელდება ინფორმაცია, რომ გომელაურის უწყების წარმომადგენლებმა დღეს კიდევ ერთი მოქალაქის, სანდრო ჭითანავას სახლიც გაჩხრიკეს, რის შემდეგაც დიღმის მთავარ სამმართველოში გადაიყვანეს.
ამასთან, ჟურნალისტმა ნანუკა ჟორჟოლიანმა სოციალურ ქსელში დაწერა, რომ ამოქალაქო ფორმაში ჩაცმულმა ადამიანებმა აქტივისტი დანიელ ბულკაშვილი გაიტაცეს.