საქართველოში დაბრუნების შემდეგ, „ქართული ოცნების“ დეპუტატმა, ირაკლი ზარქუამ მედიასთან კიდევ ერთხელ ისაუბრა აბუ-დაბიში მომხდარ ამბავზე.
„მე ამასთან დაკავშირებით რაც სათქმელი იყო, ვთქვი. არავის აქვს უფლება, რომ მე, ჩემს ოჯახს, ახლობლებს შეურაცხყოფა მოგვაყენოს. არანაირი თმენის ვალდებულება არ მაკავებს, როდესაც ჩემს შვილებს და ოჯახს ეხებიან. ასე რომ მომავალშიც, როცა ანალოგიური პროვოკაცია იქნება, იმავეს მიიღებენ. თუნდაც ციხეში წავიდე ან ჯარიმები გადავიხადო, ღირსება ყოველთვის მექნება, იმიტომ, რომ ქართველი ვარ და ასე ვმოქმედებ”, – განაცხადა ზარქუამ.
შეგახსენებთ, რომ 13 იანვარს, აბუ-დაბიში, „ქართული ოცნების“ დეპუტატები – ირაკლი ზარქუა და ვიქტორ სანიკიძე – მოქალაქე ლაშა გაბიტაშვილს ფიზიკურად დაუპირისპირდნენ.
სოციალურ ქსელში გავრცელებულ კადრებში ჩანს, რომ ლაშა გაბიტაშვილს, სადილობის დროს, ირაკლი ზარქუამ საჭმელი შეაყარა, შემდეგ კი ჩხუბში ვიქტორ სანიკიძეც ჩაერთო.
აბუ-დაბის სამართალდამცავებმა დაპირისპირებული მხარეები დაკითხა. როგორც გაირკვა, ზარქუა და სანიკიძეს ფულადი ჯარიმები დაეკისრათ.