სხვადასხვა აუდიო ჩანაწერის ხმა საზოგადოებრივ ტრანსპორტში დილიდან გაისმა. რამდენჯერმე მიკროავტობუსსა და ავტობუსში გადახდის აპარატიდან ხან საქართველოსა და ევროკავშირის ჰიმნი, ხან კი სხვა და სხვა პოლიტიკოსის ცნობილი გზავნილები ისმოდა.
სავარაუდო კიბერთავდასხმის გამო, ტრანსპორტში დამონტაჟებული მოწყობილობა მწყობრიდან გამოვიდა და გადახდის ფუნქციის ნაცვლად, მხოლოდ აუდიოჩანაწერის ხმას ავრცელებდა.
საზოგადოებრივი ტრანსპორტის მგზავრები “კურიერთან” საუბრისას ჰყვებიან, რომ აუდიოჩანაწერის ხმა მათ დილის 11 საათისთვის გაიგეს, მაშინ როცა აპარატზე ბარათის დაფიქსირებას და მგზავრობის საფასურის გადახდას ცდილობდნენ. მათივე განმარტებით, პოლიტიკოსების განცხადებები და მუსიკა, დაახლოებით, 30 წუთის განმავლობაში ისმოდა. ინციდენტის გამო, რამდენიმე საათით გაითიშა გადახდის სისტემაც.
თბილისის მერიის ინფორმაციით, საზოგადოებრივ ტრანსპორტში დამონტაჟებულ აპარატებს ტექნიკურად საქართველოს ბანკის კონტრაქტორი კომპანიები – შპს “მს+” და შპს “აზრი” უზრუნველყოფენ. “კურიერი” დღეს მათაც დაუკავშირდა, თუმცა პასუხი, ისიც მხოლოდ წერილობით მხოლოდ ერთი კომპანიისგან – “მს+”-გან მივიღეთ. სავარაუდოდ, საგანგებოდ მოწყობილ ჰაკერულ თავდასხმას ტექნიკური ხარვეზი უწოდა და საზოგადოებრივი ტრანსპორტის მგზავრებს დაჰპირდა, რომ სისტემის ტექნიკურ შემოწმება გამკაცრდება.
საზოგადოებრივ ტრანსპორტში მომხდარ ფაქტზე დღეს დედაქალაქის მერმაც ისაუბრა. კახა კალაძის თქმით, მომხდარს პასუხი გამოძიებამ უნდა გასცეს.
მომხდარ ფაქტზე შინაგან საქმეთა სამინისტრომ გამოძიება სისხლის სამართლის კოდექსის 284-ე მუხლით დაიწყო, რაც კომპიუტერულ სისტემაში უნებართვო შეღწევას გულისხმობს.