ზარზმის მამათა მონასტრის წინამძღვარს, არქიმანდრიტ ნიკოლოზ გეწაძეს, ახალგაზრდა ქალები სექსუალურ შევიწროვებაში ადანაშაულებენ. სავარაუდოდ საუბარია 5–ზე მეტ ადამიანზე – ინფორმაციას “სამხრეთის კარიბჭე” ავრცელებს. მათი ინფორმაციით, რესპონდენტები ჰყვებიან, როგორ სთავაზობდა მოძღვარი, აღსარების ჩაბარების დროს, სექსუალურ ურთიერთობას. მათი განმარტებით, ბოლო შემთხვევა გასული წლის სექტემბერში მოხდა, ფაქტის გახმაურების შემდეგ, სასულიერო პირმა ქვეყანა დატოვა. რედაქცია ესაუბრა ნიკოლოზ გეწაძეს, მან თქვა, რომ გავრცელებული ინფორმაცია სიმართლეს არ შეესაბამება.
ზარზმის მონასტერში მომხდართან დაკავშირებით, ინფორმაცია სოციალურ ქსელში 3 იანვარს დეკანოზმა, ილია ჭიღლაძემ გაავრცელა, სადაც ნათქვამია, რომ ნიკოლოზ გეწაძეს სასულიერო პირისთვის შეუფერებელი საქციელის გამო, მღვდელმსახურება შეუჩერეს.
არქიმანდრიტ ნიკოლოზ გეწაძეს ჩვენ ტელეფონით დავუკავშირდით, იგი ფაქტს უარყოფს: „არ მცალია. ყველაფერს ნუ დაიჯერებთ“, – გვითხრა მან.
ამბის გადამოწმება ვცადეთ საპატრიარქოს პრესსამსახურთან, სამკვირიანი ლოდინის შემდეგ მოგვწერეს, რომ კომენტარისთვის ადგილობრივი ეპარქიისთვის უნდა მიგვემართა. ახალციხის, ტაო-კლარჯეთისა და ლაზეთის ეპარქიის ხელომძღვანელი, მეუფე თეოდორე კი ამბობს, რომ „ეს შიდა საეკლესიო საკითხია, რომელზეც არ ისაუბრებს“.
სამივე გოგონა 30 წლამდეა. ამბობენ, რომ ფაქტის გახმაურების შემდეგ, მათზე მრევლის მხრიდან ზეწოლა ხორციელდება.
ნინო – ფეხზე რომ ავდექი უკანალზე შემეხო
ნინო (სახელი შეცვლილია) ამბობს, რომ შემთხვევა დაახლოებით წელიწადნახევრის წინ მოხდა, სასულიერო პირის კელიაში. თვეების განმავლობაში ამ ფაქტს საიდუმლოდ ინახავდა, ამბობს, რომ გახსენება დღემდე უჭირს.
მხოლოდ სატელეფონო ინტერვიუზე დაგვთანხმდა, შევთავაზეთ პირისპირ შეხვედრა, თუმცა უარი განაცხადა. თქვა, რომ „ასე მისთვის უმჯობესია“.
„ორი წლიდან ვიცნობ მამა ნიკოლოზს. მისი სულიერი შვილი ვარ 6–7 წლიდან, უფრო სწორად ვიყავი. ეს დაახლოებით წელიწადნახევრის წინ მოხდა, მამაოს ჩავაბარე აღსარება იმაზე, რასაც მძიმე ცოდვად აღვიქვამდი. მოვუყევი და ტირილი დავიწყე, იფიქრა, რომ ამ ცოდვაზე „დამიჭირა“ და შეძლებდა ჩემზე მანიპულაციას. დაიწყო ჩემზე ფსიქოლოგიური ზეწოლა. მეუბნებოდა – ცოდვაში რომ მნახო რას გააკეთებ? ჯოჯოხეთში ჩამოგყვები.. ურთიერთობაში აბსოლუტურად ყველაფერს მოგცემ, ოღონდ ვიღაც „შალიკოში“ არ გამცვალოო. შენს გვერდით დავეცემიო. ფიზიკურადაც შემავიწროვა, მითხრა ფეხზე ავმდგარიყავი, როდესაც ავდექი, ტუჩებში მაკოცა და ხელით უკანალზე შემეხო“, – ამბობს „სამხრეთის კარიბჭესთან“ ახალგაზრდა ქალი.