„ბათუმელების” ოპერატორმა, გურამ მურვანიძემ ადვოკატებთან ერთად გამართულ დღევანდელ ბრიფინგზე თავისი დაკავების შესახებ ისაუბრა.
მურვანიძის თქმით, ის დააკავეს უშუალოდ ბათუმის პოლიციის უფროსის, ირაკლი დგებუაძის ბრძანებით მას შემდეგ, რაც დგებუაძემ გაიგო, რომ „ბათუმელების” ოპერატორი იყო.
„ჩემი დაკავება ბათუმის პოლიციის უფროს ირაკლი დგებუაძის უშუალო ბრძანებით მოხდა, როცა გაიგო, რომ ბათუმელების თანამშრომელი ვიყავი. დაკავების მომენტში ორივე ხელი მაღლა მქონდა აწეული და მობილური ტელეფონით საპროტესტო აქციას ვიღებდი.
ირაკლი დგებუაძემ პოლიციის თანამშრომლებს უბრძანა, წაერთმიათ ჩემთვის ტელეფონი და წაეშალათ ინფორმაცია. ამ ბრძანების მოსმენისთანავე, ჩემთან მოვიდა რამდენიმე პოლიციელი და ხელების დამტვრევის მუქარით მომთხოვეს, მეჩვენებინა, თუ რას ვიღებდი და წამეშალა. მოვასწარი ტელეფონის დაბლოკვა და მოგვიანებით გავთიშე ის“, – აღნიშნა მურვანიძემ.
შეგახსენებთ, ბათუმის საქალაქო სასამართლომ გურამ მურვანიძეს 8-დღიანი ადმინისტრაციული პატიმრობა შეუფარდა. გურამ მურვანიძემ ფოთის იზოლატორი 20 იანვარს დატოვა.