„ქართული ოცნების“ ერთ-ერთმა ლიდერმა, მამუკა მდინარაძემ თანაპარტიელი დეპუტატების – ირაკლი ზარქუასა და ვიქტორ სანიკიძის – სკანდალურ შემთხვევასთან დაკავშირებით ისაუბრა.
„ორივე თბილისშია. პატიმრობაში არასდროს ყოფილან. ორი დღის განმავლობაში მიდიოდა საკმაოდ ინტენსიური საგამოძიებო მოქმედებები. იყვნენ აბუ-დაბიში პოლიციის განყოფილებაში, შემდეგ იყვნენ სასტუმროში, შემდეგ დასრულდა სამართალწარმოება, დატოვეს აბუ-დაბი და არიან თბილისში. დღენახევარი გაატარეს პოლიციის განყოფილებაში. დასრულდა სამართალწარმოება და ორივე მხარეს ჯარიმები დაეკისრა. რომ ვრცელდება ინფორმაცია, იმხელა ჯარიმა არაა. ამასთან მიახლოებული თანხა არაა.
სამართალდამრღვევები არიან, მაგრამ არა კრიმინალები. არავის არაფერი არ ამართლებს… მე თუ ვინმე თავს დამესხმება, აუცილებლად პასუხს გავცემ. გამართლება შეიძლება ძალადობას არცერთ შემთხვევაში არ ჰქონდეს. რთულია ქართველმა კაცმა მოითმინოს დედის გინება. გაყოყოჩებული „ქათმის“ ვაჟკაცობა არ გაიშვა და არც ქართველობა. შესაბამისი უწყებები დაინტერესებულები იყვნენ მათი ბედით და ხშირი კომუნიკაცია ჰქონდათ თავის კოლეგებთან აბუ -დაბიში. ამას გნებავთ ზრუნვა დაარქვით, გნებავთ პატრონობა დაარქვით. მე პირადადაც დაინტერესებული ვიყავი და არაერთხელ მოვიკითხე ეს ამბავი“, – განაცხადა მდინარაძემ.
შეგახსენებთ, მოქალაქე ლაშა გაბიტაშვილმა 12 იანვარს სოციალურ ქსელში გაავრცელა კადრები, რომელიც ზემოაღნიშნული დეპუტატებისა და გაბიტაშვილის სიტყვიერ დაპირისპირებას ასახავდა.
კონფლიქტი მეორე დღესაც გაგრძელდა, როცა ზარქუა და სანიკიძე მეუღლესთან ერთად მყოფ გაბიტაშვილს თავს დაესხნენ და მას ფიზიკურად გაუსწროდნენ.
დღეს „მთავარი არხმა“, წყაროზე დაყრდნობით, გაავრცელა ინფრომაცია, რომ „ქართული ოცნების“ ირაკლი ზარქუასა და ვიქტორ სანიკიძეს 80 000 დოლარის ოდენობის ჯარიმა დაეკისრათ.