ამ წუთებში შსს-თან „ნეტგაზეთისა“ და „ბათუმელების“ დაპატიმრებული ხელმძღვანელის, მზია ამაღლობელის მხარდასაჭერი აქცია იმართება.
ადგილზე ჟურნალისტები არიან შეკრებილი.
„ამ შენობაში ირაკლი დგებუაძის საქციელი, დაკავებული ქალის ჟურნალისტისთვის სახეში შეფურთხება, ცემის მცდელობა, საპირფარეშოში არ გაშვება, ეს მძიმე ამბავი იქცა ამ შენობაში მომუშავე ადამიანების სახედ. იმ 10 ათასობით პოლიციელის სახედ, რომელიც დღეს ამბობს, რომ დგას საქართველოს სამსახურში.
ვემსახურებით საქართველოს აწერია პოლიციის მანქანებს და ეს არის საქართველოს სამსახურში დგომა დაკავებულ ქალ ჟურნალისტს პოლიციის უფროსი რომ სახეში აფურთხებს?! ვიდრე თქვენ არ ამოიღებთ ხმას უღირსი კოლეგების წინააღმდეგ, თქვენც ყველანი იქნებით სახეში მაფურთხებელი პოლიციელები“, – თქვა „ტვ პირველის“ საინფორმაციო სამსახურის უფროსმა, ნოდარ მელაძემ.
შეგახსენებთ, მზია ამაღლობელს ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. მუხლი 4-დან 7 წლამდე პატიმრობას ითვალისწინებს.
ის ბათუმში, 11 იანვარს, აქციაზე დააკავეს.