გვიან ღამით, ბათუმში, სასტუმრო „შერატონში“ პარტია „საქართველოსთვის“ ლიდერს, გიორგი გახარიას თავს დაესხნენ.
ამასთან დაკავშრებით, „მეტრონომი“ პოლიტოლოგ გია ხუხაშვილს ესაუბრა.
„ეს არის აფექტი, აბსოლუტური ქაოსი. ეს ნიშნავს, რომ ჩვენ სახელმწიფოში კი აღარ ვცხოვრობთ, არამედ რაღაც კვაზი ტერიტორიაზე, სადაც მაფიოზური, კრიმინალური დაჯგუფება ძალადობს მთლიანად საზოგადოებაზე – ჟურნალისტებზე, პოლიტიკოსებსა და სხვებზე.
ფაქტობრივად, ეს არის რაღაც კრიმინალიზებული „ანკლავი“ და ეს ხდება არა მხოლოდ ქვეყნის შიგნით, არამედ გარეთაც.
ამდენად, ეს აფექტია ხელისუფლების მხრიდან. ძალის დემონსტრირებაც კი ასე არ ხდება.
ავტორიტარულ სახელმწიფოებში არის გარკვეული წესრიგი. დიახ, იქ ძალადობენ, მაგრამ ეს არის კარგად დაგეგმილი და გააზრებული, საქართველოში კი სრული განუკითხაობაა.
გუშინდელი ფაქტი დაგეგმილი არ იყო. ეს იყო წმინდა წყლის კრიმინალური, ქუჩური აქტი პოლიტიკური ნიშნით.
„ქართულ ოცნებას“ ჯერ კიდევ აქვს რესურსი, რომ იძალადოს საზოგადოებაზე, მაგრამ ეს რესურსი არ არის უსასრულო, ის მთავრდება და ამიტომაც არიან ისინი ისტერიკაში.
წარმოიდგინეთ, რა შავ დღეში ვართ. ჩვენთან, ქვეყანაში, სამართლიანობის განცდა არ გვაქვს, ვიცით, რომ ეს ხალხი დაუსჯელობის სინდრომითაა გაჟღენთილი და აბუ-დაბის სამართლის იმედზე ვართ, იქნებ, იქ მაინც ჭამოს პური სამართალმა“, – განაცხადა ხუხაშვილმა ჩვენთან საუბრისას.
თავდასხმაში „ქართული ოცნების“ წარმომადგენლები – დიმიტრი სამხარაძე და გიორგი მანველიძე – მონაწილეობდნენ.
ამასთან, ხუხაშვილი შეეხო რამდენიმე დღის წინ აბუ-დაბიში მომხდარ ფაქტს, სადაც ერთმანეთს მოქალაქე ლაშა გაბიტაშვილი და „ქართული ოცნების“ დეპუტატები – ირაკლი ზარქუა და ვიქტორ სანიკიძე – დაუპირისპირდნენ.
გავრცელებული ინფორმაციის თანახმად, ქართველი პარლამენტარები ადგილობრივმა პოლიციამ გამოკითხვაზე დაიბარა.