სოციალური მომსახურების სააგენტოს მონაცემებით, ბოლო 5 წლის განმავლობაში ასაკით პენსიონერთა რიცხვმა 10,2%-ით მოიმატა.
2024 წლის დეკემბრის მდგომარეობით, საერთო ჯამში, მათი რაოდენობა მთელი მოსახლეობის 23%-ს აჭარბებს.
საქსტატის ცნობით, საქართველოში სულ 3.694 მლნ ადამიანი ცხოვრობს, 2024 წლის დეკემბრის მონაცემებით კი, ქვეყანაში სულ 864 312 ასაკით პენსიონერია, რაც საერთო მოსახლეობის დაახლოებით 23.4%-ს შეადგენს.
აღსანიშნავია ისიც, რომ პენსიონერთა რიცხვი ბოლო რამდენიმე წლის განმავლობაში განუხრელად იზრდება. მაგალითად, 2020 წელს ასაკით პენსიონერთა რაოდენობა 783 705 იყო (მთლიანი მოსახლეობის – 21%), 2021 წელს – 793 751-მდე გაიზარდა (მთლიანი მოსახლეობის – 21.2%), 2022 წელს ასაკით პენსიონერთა რაოდენობამ 808 326 ადამიანი შეადგინა (მთლიანი მოსახლეობის – 21.9%), 2023 წელს კი ქვეყანაში 838 097 ასაკით პენსიონერი იყო (მთლიანი მოსახლეობის – 22.4%).
საქსტატის მონაცემებით, 2020 წელს საქართველოში 3 716 900 ადამიანი ცხოვრობდა, 2021 წელს – 3 728 600; 2022 წელს – 3 688 600, 2023 წელს კი 3 736 400 ადამიანი.
სპეციალისტთა აზრით, საგანგაშო არა პენსიონერების რიცხვის ზრდა, არამედ ისაა, რომ მათი წილი მოსახლეობის მთლიან რაოდენობაში ძალიან მაღალია. ეს კი ნიშნავს, რომ ქვეყანაში დაბერების პროცესი აქტიურად გრძელდება.
წყარო: bpn