აკაკი წერეთლის სახელმწიფო უნივერსიტეტი სოციალურ ქსელში სამწუხარო ინფორმაციას ავრცელებს.
„აკაკი წერეთლის სახელმწიფო უნივერსიტეტი, ჰუმანიტარულ მეცნიერებათა ფაკულტეტის ქართული ფილოლოგიის დეპარტამენტი და ქართული ენის მიმართულება მწუხარებას გამოხატავს მერი (ანიუტა) გოშხეთელიანის გარდაცვალების გამო.
ქალბატონი მერი დაიბადა 1930 წლის 28 თებერვალს; დაამთავრა ქუთაისის სახელმწიფო პედაგოგიური ინსტიტუტი ქართული ენისა და ლიტერატურის სპეციალობით; იმავე ინსტიტუტში დაიწყო მუშაობა ქართული ენის კათედრაზე ჯერ ლაბორანტად, 1970 წლიდან კი − უფროს მასწავლებლად; ეწეოდა პედაგოგიურ და სამეცნიერო საქმიანობას; პარალელურად დაამთავრა თბილისის სახელმწიფო უნივერსიტეტის ასპირანტურა; მუშაობდა სადისერტაციო თემაზე, რომელიც ვანის რაიონის ტოპონიმების შესწავლას ეძღვნებოდა; ამ საკითხებთან დაკავშირებით სამეცნიერო კრებულებში გამოქვეყნებული აქვს რამდენიმე სტატია; იგი წლების მანძილზე კეთილსინდისიერად ემსახურებოდა თავის პროფესიას, ახალგაზრდა თაობების აღზრდას, უძღვებოდა სასწავლო კურსებს ქართულ ენაში.
გახლდათ სათნოებითა და კეთილშობილებით გამორჩეული პიროვნება, სანიმუშო მეუღლე და დედა, მზრუნველი ბებია. სიცოცხლის ბოლო წლებში დიდი სულიერი ტკივილი მიაყენა მას ჯერ მეუღლის, პროფესორ გივი სანიკიძის, შემდეგ კი ვაჟიშვილის − გელას, მოულოდნელმა გარდაცვალებამ.
ქალბატონი მერი ვალმოხდილი წავიდა ამ ქვეყნიდან, 2025 წლის 8 იანვარს შეუერთდა მარადისობას. ნათელი მის სულს!
ვუსამძიმრებთ განსვენებულის ოჯახს, ახლობლებსა და კოლეგებს“, – აღნიშნულია პოსტში.