ბოლო ათი დღეა ბაკურიანში ჩამსვლელი დამსვენებელი მუდმივ საცობებზე, გაუწმენდავ გზებსა და კვების ობიექტებში გრძელ რიგებზე საუბრობს. წუხს ბიზნესიც, რომელიც უკვე წლებია ინფრასტრუქტურულ პრობლემებს სამთო კურორტის გამოწვევად ასახელებს. პრობლემებს აღიარებს სახელმწიფო უწყებებიც და ამაზე საუბარი წლებია სეზონურად აქტიურდება. თუმცა ჯერჯერობით პრობლემების დიდი ნაწილი გადაუჭრელი რჩება. მათ შორის არის დაზიანებული შიდა გზების და საპარკინგე სივრცეების არარსებობის პრობლემა.
ბაკურიანი რომ წლევანდელ სეზონსაც ბევრი პრობლემით შეხვდა, ამას აღიარებს ბაკურიანის განვითარების სააგენტოც, რომელიც როგორც მუნიციპალური სსიპ-ი, კურორტის პრობლემებზე უფრო სწრაფად და ეფექტიანად რეაგირებისთვის დაახლოებით სამი წლის წინ შეიქმნა.