ლაშა ბექაურმა საზოგადოების კრიტიკის შემდეგ ლომის ბოკვერი საჩუქრად ზოოპარკს გადასცა, თუმცა აღნიშნულ საკითხზე საუბრისას ზოოპარკის დირექტორი ზურაბ გურიელიძე ამბობდა, რომ ლომების დიდმა რაოდენობამ მათი გამრავლების შეწყვეტის აუცილებლობა წარმოშვა.
“ლომების გამრავლება ძალიან დიდი ხანია გავაჩერეთ. ბევრი ლომი გვყავს და არ გვინდოდა. სპეციალური ჩიპები არსებობს ამისთვის. გარდა ამისა, ჩვენ თეთრი ლომები გვყავს. ეს ჩვეულებრივი ლომის ბოკვერია.” – ზურაბ გურიელიძის გუშინდელი ინტერვიუს ამონარიდი.
კითხვას, გადმოცემის შემთხვევაში მზად არის თუ არა ზოოპარკი მის მისაღებად, ის შემდეგნაირად პასუხობს:
“ვერ გეტყვით, რომ მზად ვართ. მას დასჭირდება შესაბამისი პირობები. პატარა ბოკვერის ჩვენი ლომების ჯგუფში შეშვება არ არის მიზანშეწონილი, არ ვიცით, როგორ განვითარდება მოვლენები. თუ ამ გადაწყვეტილებას მიიღებენ, ჩვენ უნდა მოვემზადოთ. მას ცალკე ვოლიერი დასჭირდება, რაც პატარა თანხებთან არაა დაკავშირებული.”