დიზაინერი, თბილისის მერის მეუღლე ანუკი არეშიძე ერთ-ერთი მედიასაშუალებით გავრცელებულ ინფორმაციას ეხმაურება, სადაც დასუფთავების სამსახურის თანამშრომელი არხთან ამბობს, რომ მეეზოვეების ფორმებს თბილისის მერის, კახა კალაძის ცოლის, ანუკი არეშიძის კომპანია კერავს.
ირაკლი ბაღდავაძის თქმით, აღნიშნული ინფორმაცია მას სამკერვალოში მიაწოდეს მაშინ, როცა დახეული ფორმის გადასაკეთებლად მივიდა.
ამ თემასთან დაკავშირებით ანუკი არეშიძე “ფეისბუქის” პირად გვერდზე განცხადებას ავრცელებს:
“მსურს გავაკეთო ოფიციალური კომენტარი, გუშინ მედიის საშუალებით გავრცელებულ ინფორმაციაზე და სრული პასუხისმგებლობით განვაცხადო , რომ შპს ”ანოუკის” დაფუძნების დღიდან დღემდე არავითარი პირდაპირი ან ირიბი შემხებლობა არ ჰქონია არც შპს ”თბილსერვის” ჯგუფისა და არც სხვა რომელიმე სამთავრობო სტრუქტურის უნიფორმების წარმოებასთან.
მეტიც, არც კომპანიის მომავალ გეგმებში შედის მსგავსი ტიპის მომსახურების გაწევა სახელმწიფო სტრუქტურებისთვის.
დავაზუსტებ, რომ დღევანდელ დღეს კომპანიის მთლიანი რესურსი მომართულია ბრენდ “ანუკის” ქალის ტანსაცმლის სეზონურ წარმოებასა და რეალიზაციაზე და განსაკუთრებით გვეამაყება, რომ ჩვენი ბრენდის ქვეშ წარმოებული სამოსი წარმატებით გადის ექსპორტზე მსოფლიოს არაერთ ქვეყანაში, შესაბამისად, ჩვენი მთავარი მიზანი და ორიენტირი გახლავთ საექსპორტო ბაზრების გაფართოება და საქართველოში წარმოებული პროდუქციის პოპულარიზაცია მსოფლიო მასშტაბით.
დიდი მადლობა,”- წერს ანუკი არეშიძე სოციალურ ქსელში.