“მოასწარით, სანამ დროა… თვითმკვლელი ტერორიზმია…” – არჩილ გამზარდია

ტრანსპორტის ჩაკეტვას ძალიან უშველია, შემცირებულა კოვიდის მაჩვენებელი, არა?
6200-ზე მეტი შემთხვევა გვაქვს, რეგვენო ხელისუფლებავ. ტრანსპორტი გახსენით და რეალური ღონისძიებები გაატარეთ ამ იმიტაციების ნაცვლად,” – ამის შესახებ ანალიტიკოსი და ტელეწამყვანი არჩილ გამზარდია “ფეისბუქის” პირად გვერდზე წერს, რომელიც ქვეყანაში გართულებულ ეპიდემიოლოგიური ვითარებას ეხმაურება:

“სანედიცინო პერსონალი არანაირ ტრენირებას არ გადის თვეებია, შტამი რთულდება და მედიკოსები ვერ ეწევიან პროცესს, მკურნალობის პროტოკოლი არ იცვლება, ჯანდაცვის მართვა ისეა, როგორც ვირუსის შემოსვლისას.

ერთადერთი ხსნა აცრაა, მისი ეფექტიც ჯამში თვენახევრიდან იწყება (ორი აცრა + 2 კვირა).

თვითმკვლელი ტერორიზმია დღეს აუცრელობა, საკუთარ თავსაც ღუპავს და სხვასაც.
აიცერით სანამ დროა და სანამ ვაქცინებია, აქტიური მიმართვიანობის შემთხვევაში არც ვაქცინებია საკმარისი. მოასწარით, სანამ დროა,” – წერს გამზარდია სოციალურ ქსელში.

ცნობისთვის, ბოლო 24 საათის განმავლობაში საქართველოში კორონავირუსის 6 208 ახალი შემთხვევა დაფიქსირდა. ინფექციის გავრცელების დღიდან საქართველოში გამოვლენილი დადასტურებული შემთხვევების საერთო რაოდენობა შეადგენს 490 462-ს.

ქვეყნის მასშტაბით COVID-19-ით კიდევ 47 ადამიანი გარდაიცვალა. ვირუსს პანდემიის გავრცელებიდან საქართველოში 6 483 ადამიანი ემსხვერპლა.

ბოლო 24 საათში კორონავირუსისგან გამოჯანმრთელდა 3 539 ინფიცირებული. ხოლო ჯამში გამოჯანმრთელებულთა რაოდენობა გაიზარდა 429 190-მდე.

ბოლო 24 საათში ჩატარებული კვლევა ტესტით – 47 872, მათ შორის ანტიგენის სწრაფი ტესტით – 33 873, PCR ტესტით – 13 999.

დადებითობის მაჩვენებელი: დღიური – 12,97%, ბოლო 14 დღის – 10,63%, ბოლო 7 დღის – 11,14%.

სულ აცრილია – 831 815, დღიურად აცრილია – 25 083 ადამიანი.

ამასთან, საკოორდინაციო საბჭოს გადაწყვეტილებით, ღია სივრცეში პირბადის ტარება კვლავ სავალდებულო ხდება.

„საბჭოს გადაწყვეტილებით, დაემატა ახალი რეგულაცია, რომელიც ეხება პირბადის სავალდებულო ტარებას. დღეიდან შიდა და გარე სივრცეში სავალდებულო ხდება პირბადის გამოყენება. ჩვენ თვეების განმავლობაში ყოველთვის ვამბობდიით, თუ რამდენად ეფექტურია პირბადე ინფექციისგან დასაცავად. დღევანდელი ეპიდვითარების გათვალისწინებით მიგვაჩნია, რომ ეს იქნება ერთ- ერთი ყველაზე მნიშველოვანი და ეფექტური საშუალება, რათა ჩვენ შევძლოთ და მოვახდინოთ მეოთხე ტალღის ეფექტურად დაძლევა“, – განაცხადა ჯანდაცვის მინისტრმა ეკატერინე ტიკარაძემ.

ერთი კვირის წინ საბჭომ მიიღო გადაწყვეტილება, რომლის თანახმადაც, პირბადის ტარება სავალდებულო გახდა ღია სივრცეში, სადაც ხუთზე მეტი ადამიანი იკრიბება.