“ეკლესია შიგნიდან ზიანდება, გარედან ვერავინ ვერაფერს დააკლებს – ასეთები ანგრევენ ეკლესიას…” – დეკანოზი თეოდორე გიგნაძე

გთავაზობთ დეკანოზ თეოდორე გიგნაძის გადაქებიდან ამონარიდს, რომელიც ეკლესიის წინააღმდეგ ბრძოლაზე საუბრობს:

“განსჯის უნარი ძალიან მნიშვნელოვანია და ერთ-ერთი მთავარი არის ის, რომ ხე ნაყოფით იცნობა – უფალი გვასწავლის ამას.

ძალიან ხშირ შემთხვევაში ადამიანები ისე განსჯიან რაღაც მოვლენას, თითქოს ბრმები არიან და ვერ ხედავენ ხილულ ნაყოფებს, და მხოლოდ საკთარი, სუბიექტური სიმართლით იწყებენ რაღაცების განსჯას. ასეთი მდგომარეობა ყოველთვის განწირულია
და საქმის გამოუძიებლად, ჩაუხედავად, ნაყოფის დანახვის გარეშე და მთავარის დანახვის გარეშე, იწყებენ რაღაც პოზიციაზე დგომას, ამით კიდევ უფრო აზიანებენ საკუთარ სულს და ანგრევენ ეკლესიას.

ის ბოლო პერიოდი, რაც ეკლესიის წინააღმდეგ ბრძოლებს ვხედავთ, ჩვენ ხშირად გვითქვამს, რომ ბრძოლები არის გარედან და ბრძოლები არის შიგნიდან… გარეგანი დარტყმები ეკლესიას ვერაფერს დააკლებს, შეუძლებელია ეკლესიას რამე დააკლო გარედან. ეკლესია ზიანდება მხოლოდ შიგნიდან, ეს ხდება სხვადასხვა მიმართულებით და ერთ-ერთი არის უზნეობა, რომელიც შეიძლება იყოს ჩვენში და ანგრევდეს ეკლესიას
და მთავარის ვერ დანახვა ეკლესიაში, რაც არის იესო ქრისტე, ევქარისტია და ის სათნოებები, რომელიც ქრისტემ მოგვიტანა, რომელიც თუ არ აღვასრულეთ, ადამიანი ხდება უგნური, ფანატიკოსი, პატივმოყვარე, კარიერისტი, ეკლესიაში. ასეთები ანგრევენ ეკლესიას. თუ ჩვენ ასეთები ვიქნებით, ჩვენ დავანგრევთ ეკლესიას, თორემ ეკლესიას გარედან ვერავინ ვერაფერს დააკლებს.”