“არ მოიწყინო! მალე შევხვდებით” – ზაზა სარალიძის ემოციური მიმართვა გარდაცვლილ შვილს

გუშინ, 25 მაისს, დათუნა სარალიძეს 20 წელი შეუსრულდებოდა.

ხორავას ქუჩაზე სასტიკად მოკლული არასრულწლოვნის მამა, ზაზა სარალიძე შვილს დაბადების დღეს ემოციური პოსტით ულოცავს.

„გილოცავ მამი შენს დღეს იმიერ საქართველოში. არ მოიწყინო! მალე შევხვდებით,“ – წერს ზაზა სარალიძე სოციალურ ქსელში.

2017 წლის პირველ დეკემბერს, ხორავას ქუჩაზე მომხდარი მკვლელობის საქმეზე, რომელსაც ორი მოზარდის, დავით სარალიძისა და ლევან დადუნაშვილის სიცოცხლე ემსხვერპლა, მსჯავრდებულები იყვნენ – გიორგი ჯანაშია, გუგა ბარბაქაძე და მიხეილ კალანდია.

დავით სარალიძის განზრახ ჯგუფურად მკვლელობაში მსჯავრდებულმა გიორგი ჯანაშიამ პენიტენციური დაწესებულება უკვე დატოვა. ის ე.წ. უდოს კომისიამ გაათავისუფლა. მას საპროცესო შეთანხმების საფუძველზე 4 წლით თავისუფლების აღკვეთა ჰქონდა შეფარდებული. რაც შეეხება მიხეილ კალანდიას, მას სამივე ინსტანციის სასამართლოს მიერ პატიმრობა 11 წლითა და 3 თვის ვადით აქვს მისჯილი.