გაეროს გენერალური მდივნის მრჩეველი, საზოგადოებრივი ჯანდაცვის ექსპერტი, პროფესორი გიორგი ფხაკაძე “ფეისბუქის” პირადი გვერდის მეშვეობით საქართველოს მთავრობას ეპიდემიასთან ბრძოლაში გაწეული სამუშაოსთვის მადლობას უხდის:
“ფაიზერის“ ვაქცინის 500 ათასი დოზა საქართველოშია! ეს საქართველოსთვის ნამდვილად დიდი წარმატებაა. მე მინდა, დიდი მადლობა გადავუხადო საქართველოს პრემიერ-მინისტრს, ბატონ ირაკლი ღარიბაშვილს, რადგან აშკარაა, რომ ეს ყველაფერი მოხდა მისი ძალისხმევით. საქართველოს ჯანდაცვის მინისტრს, ქალბატონ ეკატერინე ტიკარაძეს, საქართველოს ჯანდაცვის მინისტრის მოადგილეს, ქალბატონ თამარ გაბუნიას თქვენ შეუძლებელი შეძელით!
ასობით ქვეყანას ჯერ არც კი დაუწყია საყოველთაო ვაქცინაცია და მაღალეფექტური და უსაფრთხო ვაქცინები, როგირიცაა “ფაიზერი”, საერთოდ წარმოუდგენელი ოცნებაა ამ ქვეყნებისთვის.
იმედია, ეს ტემპი არ დავარდება და ყველა ძალისხმევა იქნება გამოყენებული, რომ საქართველოში მაღალეფექტური ვაქცინები კვლავაც ხელმისაწვდომი იყოს!
დიდი მადლობა ჩვენი ქვეყნის ნამდვილ მეგობარს, ამერიკის მთავრობასა და უშუალოდ პრეზიდენტ ჯო ბაიდენს. ეს მხოლოდ დასაწყისია ამ პანდემიის დასასრულის, მაგრამ მთავარი ისაა, რომ პანდემიის დასრულება შესაძლებელია!
იმედია, “ფაიზერის” ვაქცინის ახალი პარტიების შემოტანასთან ერთად სწორი გადაწყვეტილება იქნება მიღებული:
ყველა სამედიცინო დაწესებულების თანამშრომლები რეგისტრაციის დროს პრიორიტეტულ სიაში იქნებიან. ჩვენი უსაფრთხოების დამცველები, განსაკუთრებით, საპატრულო და სასაზღვრო სამსახურები, იქნებიან პრიორიტეტულები რეგისტრაციის დროს და ყველა იმ კეთილსინდისიერ მოქალაქეს, რომელმაც თავისი მოქალაქეობრივი ვალი მოიხადა და აიცრა დაბალეფექტური ვაქცინებით, 3-5 თვეში მათ მიეცემათ საშუალება, დარეგისტრირდნენ “ფაიზერის” “ბუსტერზე”.
ყველაფერი გავაკეთოთ, რომ ქვეყანა არ ჩაიკეტოს და ეს შესაძლებელია! ყველგან გამოვიყენოთ სამედიცინო პირბადე, მაქსიმალურად დავიცვათ დისტანცია. გავაგრძელოთ მაღალეფექტური და უსაფრთხო ვაქცინებით ვაქცინაცია,” – წერს ფხაკაძე სოციალურ ქსელში.
ამერიკის მთავრობისა და უშუალოდ პრეზიდენტ ჯო ბაიდენის გადაწყვეტილებით, საქართველოსთვის საჩუქრად გადმოცემული „ფაიზერის“ ვაქცინის 500 000 დოზა საქართველოში ორი დღის წინ ჩამოვიდა.
ფაიზერის“ პირველი დოზით ვაქცინაციის პროცესი დღეიდან დაიწყება.
„ფაიზერით“ იმუნიზაცია მოქალაქეებს 37 სამედიცინო დაწესებულებაში შეეძლებათ.
ამასთან, „ფაიზერით“ ვაქცინაცია 16 წლის და ზემოთ ასაკის პირებისთვის იქნება შესაძლებელი.
ვაქცინაციისთვის საჭირო ორი დოზა 21-28 დღის ინტერვალით კეთდება.
„ფაიზერით“ ვაქცინაციისთვის ვიზიტის დაჯავშნა შესაძლებელია ელექტრონულ პორტალზე – booking.moh.gov.ge.
რეგისტრაციასთან დაკავშირებული კონსულტაციის მიღება ასევე შესაძლებელია ნომერზე – 15 22.
წინასწარი ჯავშნების შესახებ საბოლოო დასტურს მოქალაქეები 24 საათის განმავლობაში მოკლე ტექსტური შეტყობინებით იღებენ.