ქვეყანაში არსებულ მძიმე ეპიდემიოლოგიურ სიტუაციაზე ალერგოლოგ-იმუნოლოგმა ბიძინა კულუმბეგოვმა “რუსთავი 2”-ის ეთერში ისაუბრა. როგორც კულუმბეგოვმა თამარ ურუშაძესთან ინტერვიუში აღნიშნა, კორონავირუსის შემთხვევების მატების შესაჩერებლად, სახელმწიფომ რისკის ქვეყნებიდან ტურისტების შემოსვლა უნდა აკრძალოს.
მისივე თქმით, ჯანდაცვის სისტემაში მომუშავე ადამიანებისთვის, ვაქცინაცია სავალდებულო უნდა გახდეს.
“ჩვენი მთავარი პრობლემა ახლა, ამ ტალღის პირობებში გახლავთ ვაქცინირების ძალიან დაბალი პროცენტი და ამ დროს ქვეყნის სრული გახსნა და დერეგულაცია. ჩვენ ამით ვერაფერი მოვიგეთ სამწუხაროდ. ერთადერთ გამოსავალს, რა თქმა უნდა ურემი, რომ გადაბრუნდება მერე არის ეს გამოსავალი, მაგრამ რისკის ქვეყნებიდან უნდა აიკრძალოს ტურისტების შემოსვლა. ჩვენ გვყავს ჩრდილოელი მეზობელი რისკის ქვეყანა, სადაც გაყალბებული ცნობებით მოდიან. ადამიანების ძალიან დიდი ნაწილი მინიმალური თანხის საფასურად აყალბებენ PCR-ის ცნობებს და ეს საკმარისი არ უნდა იყოს მათი აქ შემოშვებისთვის. კარანტინის რეჟიმი უნდა დაწესდეს. ასეთი ტიპის რეგულაციები ვფიქრობ ერთ-ერთი გამოსავალი იქნება. სამედიცინო სფეროს წარმომადგენლები ძალიან დიდი რისკის წინაშე დგანან, სამწუხაროდ დაბალი სამედიცინო პერსონალი ამას ვერ აცნობიერებს და ალბათ ქვეყანამ უნდა მიიღოს გადაწყვეტილება და სავალდებულო ვაქცინაცია სამედიცინო პერსონალს შორის მაინც უნდა დააწესოს,“- განაცხადა “დღის კურიერში” საუბრისას კულუმბეგოვმა.
აღნიშნულთან დაკავშირებით კულუმბეგოვმა “ფეისბუქის” პირად გვერდზეც დაწერა, რომ პანდემიის დასამარცხებლად მხოლოდ ორი საშუალებაა: – “აცრა და პირბადე”.
“ყოველგვარი პათეტიკის გარეშე, ორი ღვთაებრივი საუნჯე დაგვრჩა პანდემიის დასამარცხებლად: – აცრა და პირბადე!” – წერს კულუმბეგოვი სოციალურ ქსელში.