“პატრიოტთა ალიანსის” ყოფილი წევრი, ემზარ კვიციანი “ფეისბუქის” პირად გვერდზე, ძალადობრივი ჯგუფების წარმომადგენლების, გურამ ფალავანდიშვილისა და “ალტ ინფოს” დამფუძნებლის, ზურაბ მახარაძის სახლების ჩხრეკისა და პოლიციის განყოფილებაში გადაყვანის ფაქტს ეხმაურება.
როგორც კვიციანი წერს, “ეროვნულ ძალებს ზურგს სუს-ი უმაგრებდა”
“ეს თუ მართალია ესე იგი რასაც ვიძახდი, რომ სუს-ი ბოლო მომენტში დააღალატებს ეროვნულ ძალებსთქო ახდა!!!
აი, ამიტომ არ ვერევი არაფერში!
საქმე თუ გინდა გააკეთოაი, ამიტომ არ ვერევი არაფერში! ის სწორად უნდა დაიწყო!
ამ ფარჩაკების ზედმეტი თავდაჯერობა მეტყველებდა იმაზე, რომ სუს-ი უმაგრებდათ ზურგს!!!” – წერს კვიციანი სოციალურ ქსელში.
“თბილისი პრაიდის” მოწინააღმდეგეთა აქციის ორგანიზატორის, გურამ ფალავანდიშვილის სახლი სამართალდამცველებმა დღეს დილით გაჩხრიკეს. ჰომოფობიური და მოძალადეობრივი ჯგუფის ლიდერები ალექსანდრე და გურამ ფალავანდიშვილები პოლიციამ საგამოძიებო უწყებაში ჩხრეკის შემდეგ გადაიყვანა. წასვლამდე გურამ ფალავანდიშვილმა ჟურნალისტებს განუცხადა, რომ დასაკავებელი არის არა ის, არამედ მედიის წარმომადგენლები:
“ჩვენ სახლში ვერაფერი კანონსაწინააღმდეგო ვერ ნახეს, ვერც ნივთი და ვერც ნივთიერება. ჩვენ ვართ ძალიან კანონმორჩილი ხალხი, თუ ეს კანონები არ ეწინააღმდეგება 10 მცნებას. როგორც მე ვიცი არ გვაკავებენ, უნდათ დაკითხვა. ჩვენ უარს ვამბობთ დაკითხვაზე, მხოლოდ სასამართლოზე და ადვოკატთან ერთად. გამოვთქვამთ წუხილს რომ არ აკავებენ ძალადობის ინიციატორებს “თბილისი პრაიდს” და მედია ტერორისტებს – ტელევიზიებს, უნდა დაგაკავონ თქვენ,”- განაცხადა გურამ ფალავანდიშვილმა.
საცხოვრებელ სახლში ჩხრეკის დასრულებს შემდეგ, სამართალდამცველებმა პოლიციის განყოფილებაში “ალტ-ინფოს“ დამფუძნებელი, ზურაბ მახარაძეც გადაიყვანეს.