“თბილისი პრაიდის” მოწინააღმდეგეთა აქციის ორგანიზატორების სახლის ჩხრეკისა და საგამოძიებო უწყებაში გადაყვანის ფაქტს, ტელეკომპანია “ფორმულას” წამყვანი მიშა მშვილდაძე “ფეისბუქის” პირად გვერდზე ეხმაურება:
“რა ფალავანდიშვილის სახლის ჩხრეკა თქვე კლოუნ-პასტანოვშიკებო – რად უნდა სახლის ჩხრეკა, ყრია ინტერნეტში მაგათი დანაშაულის კადრები – ძალადობრივი მოწოდებები და დანაშაულის სამხილები – პირდაპირ ყრია და იგუგლება – და ესენი სახლს ჩხრეკენ თურმე დანაშაულის ჩადენის მომენტიდან კვირაზე მეტია მერე – სიმულირებენ გამოძიებას ეს აფერისტები და თუ არ ჩავაჭირეთ ბოლომდე, არც არავის დასჯიან, იფაფხურებენ და გაჩერდებიან.
დააპატიმრეთ ფალავანდიშვილი მახარაძე და მორგოშია – ამ სამზე საკმარისი საფუძველია უკვე ძალადობის ორგანიზებისა და მოწოდების მუხლით დასაკავებლად და სხვა გზა არ გაქვთ ძალოვანებს – მიხვდეთ იქნებ.
ჩვენი პროტესტი რომ არა, ამასაც არ იზამდნენ მეგობრებო, ფაქტია აგერ, რომ მუშაობს ჩვენი პროტესტი და არ გავჩერდეთ, მივიყვანოთ ბოლომდე ეს ამბავი.
შაბათს ექვსზე ყველანი რუსთაველზე!” – წერს მშვილდაძე.
“თბილისი პრაიდის” მოწინააღმდეგეთა აქციის ორგანიზატორის, გურამ ფალავანდიშვილის სახლი სამართალდამცველებმა დღეს დილით გაჩხრიკეს. ჰომოფობიური და მოძალადეობრივი ჯგუფის ლიდერები ალექსანდრე და გურამ ფალავანდიშვილები პოლიციამ საგამოძიებო უწყებაში ჩხრეკის შემდეგ გადაიყვანა. წასვლამდე გურამ ფალავანდიშვილმა კომენტარი მედიასთან გააკეთა და განაცხადა, რომ დასაკავებელი არის არა ის, არამედ მედიის წარმომადგენლები:
“ჩვენ სახლში ვერაფერი კანონსაწინააღმდეგო ვერ ნახეს, ვერც ნივთი და ვერც ნივთიერება. ჩვენ ვართ ძალიან კანონმორჩილი ხალხი, თუ ეს კანონები არ ეწინააღმდეგება 10 მცნებას. როგორც მე ვიცი არ გვაკავებენ, უნდათ დაკითხვა. ჩვენ უარს ვამბობთ დაკითხვაზე, მხოლოდ სასამართლოზე და ადვოკატთან ერთად. გამოვთქვამთ წუხილს რომ არ აკავებენ ძალადობის ინიციატორებს “თბილისი პრაიდს” და მედია ტერორისტებს – ტელევიზიებს, უნდა დაგაკავონ თქვენ,”- განაცხადა გურამ ფალავანდიშვილმა.
საცხოვრებელ სახლში ჩხრეკის დასრულებს შემდეგ, სამართალდამცველებმა პოლიციის განყოფილებაში “ალტ-ინფოს“ დამფუძნებელი, ზურაბ მახარაძეც გადაიყვანეს.