უკვე მიდის მსჯელობა ვაქცინის მესამე დოზა, ე.წ. ბუსტერის თაობაზე“, – ამის შესახებ ჯანდაცვის მინისტრის მოადგილემ თამარ გაბუნიამ პარლამენტის საფინანსო-საბიუჯეტო კომიტეტის სხდომაზე განაცხადა.
აღნიშნულ საკითხს გაეროს გენერალური მდივნის მრჩეველი, საზოგადოებრივი ჯანდაცვის ექსპერტი, პროფესორი გიორგი ფხაკაძე “ფეისბუქის” პირად გვერდზე ეხმაურება:
„ვაქცინის ბუსტერი არის გარდაუვალი. ამას უკვე რამდენი ხანია ვამბობ. ჯერ უარყოფა, მერე მსჯელობა, და მერე გამოიღვიძეთ… ამასობაში იკარგება დრო. იკარგება ჩვენი სიცოცხლეები. არაპროფესიონალიზმი კლავს.
ამ კვირის ბოლომდე (2 დღეში) მიიღეთ სწორი გადაწყვეტილება, რომელი?! აიღეთ მაგალითი ან სინგაპურიდან (ყველაზე კარგი მაგალითი რაც არის ახლა) ან ბაჰრეინიდან ან ტაილანდიდან.
იმოქმედეთ (საბჭოების და კომიტეტების საყურადღებოდ) რავი ვინ მსჯელობს ამ საკითხებზე თქვენ იცით?!“,- წერს გიორგი ფხაკაძე სოციალურ ქსელში.
თამარ გაბუნია განცხადებით, თუ ვაქცინაციის პროცესი ეფექტური იქნება, მომავალ წელს დანაზოგი მოსალოდნელია ტესტირების ნაწილში.
„სამომავლოდ, ჩვენ ვფიქრობთ, რომ ვაქცინაციის პროგრამის საშუალებით, ტესტირების პროგრამის აუცილებლობა ეტაპობრივად შემცირდება. ის ძირითადი ჯგუფები, რომელსაც საკმაოდ დიდი რესურსი სჭირდება ტესტირებისთვის, ბიზნესჯგუფებზე მაქვს საუბარი, აცრის შემთხვევაში უკვე აღარ საჭიროებს სისტემურ ტესტირებას. ეს იქნება დანაზოგი თანხა, რაც დარჩება ბიუჯეტში, ან სხვა მიზნებისთვის იქნება გამოყენებული ჯანდაცვის სექტორში.
მომავალ წელს გარკვეულწილად დანაზოგი მოსალოდნელია ტესტირების ნაწილში, თუ ვაქცინაციის პროცესი ეფექტური იქენება, მაგრამ მომავალ წელსაც, ჩვენ მოგვიწევს გარკვეული რესურსის მობილიზება ვაქცინაციისთვის.
უკვე მიდის მსჯელობა მესამე „ბუსტერი“ დოზის თაობაზე, ასევე წელს ჩვენ 60%-იანი სამიზნე გვაქვს დასმული, თუმცა 60% არ ნიშნავს, რომ დანარჩენი 40% არ უნდა აიცრას. მომავალ წელსაც უნდა გავრცელდეს ვაქცინაციის პროგრამა“, – განაცხადა თამარ გაბუნიამ.