მასწავლებელთა ანაზღაურების წესში ცვლილება შევიდა. შესაბამისი ბრძანება საკანონმდებლო მაცნეზე უკვე გამოქვეყნდა. ბრძანებაში წერია, რომ ამჯერად ხელფასები არჩევითი საგნების მასწავლებლებს გაეზრდებათ.
კერძოდ, არჩევითი საგნების სწავლებაც ახალი სახელფასო ფორმულით ანაზღაურდება.
დოკუმენტში ვკითხულობთ – “მასწავლებელს, რომელსაც მინიჭებული აქვს მასწავლებლის სტატუსი და ასწავლის იმ საგნობრივ ჯგუფში შემავალ ერთ-ერთ საგანს, რომელშიც ჩაბარებული აქვს გამოცდა ან უდასტურდება დოქტორის ან მასთან გათანაბრებული აკადემიური ხარისხი ან რომელსაც განსაკუთრებულ შემთხვევაში საქართველოს კანონმდებლობით დადგენილი წესით მინიჭებული აქვს სქემით განსაზღვრული ერთ-ერთი სტატუსი, შრომის ანაზღაურება 2026-2027 სასწავლო წლის დაწყებამდე დაუანგარიშდება ამ დანართით დადგენილი წესით”.
უფრო კონკრეტულად, თუ შრომის ანაზღაურების დაანგარიშების პერიოდისთვის, არჩევითი საგნის მასწავლებლის საგაკვეთილო დატვირთვის შესაბამისად გაანგარიშებული შრომის ანაზღაურება მეტია, იმ დანართით [მასწავლლების ანაზღაურების დაანგარიშების ახალი მეთოდით] დადგენილი წესით გაანგარიშებულ ოდენობაზე, მასწავლებელს მიეცემა ამ ახალი წესით დაანგარიშებული შრომის ანაზღაურების ოდენობა და დამატებით 200 ლარი 2026-2027 სასწავლო წლის დაწყებამდე.
როგორც განათლების სამინისტრო განმარტავს, ცვლილება შეეხება უცხო ენების საგნობრივ ჯგუფში შემავალ ყველა და იმ არჩევით საგნებსაც, რომელიც ორი ან მეტი საგნობრივი ჯგუფისთვის საზიაროა.