16 სექტემბერს, ნიუ-იორკში ამერიკული ჰიპ-ჰოპ ინდუსტრიის ერთ-ერთი ყველაზე დიდი წარმომადგენელი, პროდიუსერი და რეპერი შონ კომბსი (იგივე Puff Daddy, P.Diddy, Diddy, Diddy – Dirty Money) დააკავეს. მუსიკოსს სექს ტრეფიკინგი, პროსტიტუციისთვის ხელის შეწყობა და რეკეტი ედება ბრალად. ადვოკატებმა რეპერის $50 მილიონის ოდენობის გირაოთი გამოყვანა სცადეს, თუმცა 18 სექტემბერს სასამართლომ შუამავლობა არ დააკმაყოფილა.
შონ ქომბსის სასამართლო პროცესი მომავალი წლის 5 მაისს დაიწყება. ქომბსს დღემდე არ უღიარებია აღნიშნული ბრალდებები და თავს უდანაშაულოდ მიიჩნევს. ბრალის დამტკიცების შემთხვევაში, მას მინიმუმ 15 წლით თავისუფლების აღკვეთა ან სამუდამო პატიმრობა ემუქრება.
ადვოკატების განცხადებით 100-ზე მეტი ახალი სარჩელი მზადდება რეპერი შონ კომბსის (იგივე Puff Daddy) წინააღმდეგ, რომელსაც სექსუალურ ძალადობაში სდებენ ბრალს.
შონ კობსს სექსუალური ძალადობისთვის უჩივიან როგორც ქალები, ისე მამაკაცები. 120 მომჩივანიდან 25, შემთხვევის დროს, არასრულწლოვანი იყო, მათგან ყველაზე ახალგაზრდა 9 წლის, სავარაუდო მსხვერპლების უმეტესობა აფროამერიკელია, 120-დან მხოლოდ მესამედია თეთრკანიანი.