დაავადებათა კონტროლის ეროვნული ცენტრის დირექტორის ამირან გამყრელიძის განცხადებით, “ქვეყანას ემუქრება ძალიან რთული სიტუაცია, დიდი ალბათობით, შეიძლება, შევიდეთ მძიმე, მეოთხე ტალღაში”
როგორც გამყრელიძემ უწყებათაშორისი საბჭოს სხდომის დასრულების შემდეგ თქვა, ქვეყანაში ეპიდსიტუაცია უარესდება და დაავადებათა კონტროლის ცენტრი საკოორდინაციო საბჭოზე სამი რეკომენდაციით წარსდგა, რაც გულისხმობს ვაქცინაციის მეტ ინტენსიფიცირებას, ტესტირების კიდევ უფრო მეტად გაფართოებას და არსებული რეკომენდაციების და შეზღუდვების სრულად დაცვას.
„დაწყებული მთავრობით და დამთავრებული საზოგადოებით, ჩვენი ყველას საერთო პასუხისმგებლობაა, რომ საზოგადოება იყოს მეტად სოლიდარული, მეტად ურთიერთ გამგები განსაკუთრებით დღეს, როცა ქვეყანას ემუქრება ძალიან რთული სიტუაცია, როდესაც ჩვენ, დიდი ალბათობით შეიძლება შევიდეთ მძიმე, მეოთხე ტალღაში იმიტომ, რომ მოგეხსენებათ, ეპიდსიტუაცია ქვეყანაში უარესდება. კორონა ვირუსმა არ იცის არც პოზიცია, არც ოპოზიცია, ერთიანად აზიანებს ყველას და მიაქვს ძალიან ბევრი სიცოცხლე, სამწუხაროდ. ამიტომ, მოგიწოდებთ ყველას მეტი სოლიდარობისკენ და მეტი ყურადღებისკენ, რომ როგორმე ერთად ყოფნით შევაკავოთ ინფექცია და სამშვიდობოზე გავიდეთ“, – განაცხადა ამირან გამყრელიძემ.
დაავადებათა კონტროლის და საზოგადოებრივი ჯანმრთელობის ეროვნული ცენტრის გენერალურმა დირექტორმა, კორონავირუსის “დელტა” შტამზეც ისაუბრა და აღნიშნა, რომ ის უფრო მომავალ თაობას აზიანებს, განსაკუთრებით კი, ბავშვებს.
“კორონავირუსის “დელტა შტამი” უფრო აზიანებს მომავალ თაობას, განსაკუთრებით კი, ბავშვებს. უკვე არის ბავშვთა ინფიცირების გარკვეული ზრდა და ბავშვთა საავადმყოფოებში საწოლფონდის დატვირთა,”- განაცხადა ამირან გამყრელიძემ.