ბათუმში, მოსწავლე-ახალგაზრდობის სახლის დირექტორის თამარ მესხიძის განცხადებით, ცეკვის მასწავლებელი, რომელმაც 12 წლის მოზარდს სცემა სამსახურიდან მაშინვე გაათავისუფლეს.
“პედაგოგმა იძალადა მოსწავლეზე, ეს ფაქტი იმ დღეს არ გახმაურებულა, მეორე დღეს, როგორც მე გავიგე, სამსახურში ამ დროს არ ვიყავი, საღამო იყო, მოვიდნენ მშობლები, მოხდა ინციდენტი, მოხდა პოლიციის გამოძახება და სწორედ ამ დროს შევიტყვე ფაქტის შესახებ. ამოღებული იქნა მასალები, სადაც ვიხილეთ ის რაც გუშინ გამოქვეყნდა სოციალურ ქსელში. დავსაჯეო და დასჯის ფაქტი ვნახეთ. ეგრევე გაფორმდა ბრძანება მისი გათავისუფლების შესახებ,” – განაცხადა თამარ მესხიძემ.
“გეხვეწებით რა მე თავი დამანებეთ, ამ ხალხმა მე გამწირა, აღარ მინდა საუბარი. რა იყო [მიზეზი] და ბავშვი მიცემა, კუთხეში გაყვანილი ჰყავდა, ბავშვი გამისისხლიანა. სასამართლო იქნება, დამტკიცდება ყველაფერი,” – ამბობს პედაგოგი მერაბ დოლიძე.
პედაგოდის მხრიდან ძალადობაზე საუბრობს ერთ-ერი მოზარდის მამაც. მოზარდის მამის, გოჩა მელაძის თქმით, ბავშვზე “წამორტყმასთან” დაკავშირებით მას მასწავლებელთან ადრეც ჰქონდა საუბარი და დაჰპირდა, რომ მსგავსი აღარ განმეორდებოდა.
“ადრე ჩემი მხრიდან ბავშვზე ე.წ წამორტყმასთან დაკავშირებით მე მქონდა საუბარი, მაგრამ მშვიდობიანად, ლამაზად ავუხსენი, რომ არასწორი ფორმა იყო, დაუშვებელი იყო და მანაც მითხრა, რომ არ განმეორდებოდა. ის რაც ახლა თქვენ ნახეთ კადრში, ვერც კი წარმოვიდგენდი. როდესაც ჩვენი ოჯახის წევრი ბავშვის გამოსაყვანად მივიდა, ბავშვი იყო ნატირები, სერიოზულად ნანერვიულები და ბიცოლას უთხრა, რომ მასწავლებელმა გამლახაო. იქვე დაუწყო საქმის რჩევა და ბავშვს უყვიროდა და თვალებს უბრიალებდაო, ვინ დაგარტყაო ხელიო, მე ხელი არ დამიკარებიაო. როდესაც ჩემი მეუღლე მივიდა დააკაკუნა, კარი შეაღო და სთხოვა აეხსნა რაში იყო საქმე, იყო აგრესიული და გაიწია ჩემი დისკენ და ჩემებმა გამოიძახეს საპატრულოს, ამოიღეს კადრები და ამის შემდეგ გახდა ცნობილი რასთან გვქონდა საქმე,” – განაცხადა მოზარდის მამამ, გოჩა მელაძემ.
ცნობისთვის, „ბათუმელებმა“ გაავრცელა უმძიმესი ვიდეო, სადაც ჩანს, როგორ სცემს ბათუმის მოსწავლე ახალგაზრდობის სასახლეში ქორეოგრაფი 12 წლის მოზარდს. მასწავლებელი, რომლის კადრებმა დილიდან სოციალური ქსელები მოიცვა, მერაბ დოლიძეა. მას ცეკვის მასწავლებლად მუშაობის 25-წლიანი გამოცდილება აქვს. ის სამსახურიდან უკვე გაათავისუფლეს.
სოციალურ ქსელში გავრცელებულ კადრებში ჩანს, რომ გაკვეთილის განმავლობაში მასწავლებელმა ბავშვზე არაერთხელ, იძალადა. ფაქტზე დაწყებულია გამოძიება. ძალადობაში მხილებული პედაგოგი დაკავებული არ არის, თუმცა მას ბათუმის საქალაქო სასამართლოს მოსამართლემ 2000-ლარიანი გირაო შეუფარდა.