ფებურთის გულშემატკივრები “ჯვაროსნების” თამაშებიდან თამაშებამდე რამდენიმე აქტუალურ საკითხს განიხილავენ, მათ შორისაა ბუდუ ზივზივაძის სათამაშო დრო. საზოგადოების ნაწილი თვლის, რომ ის ძირითად დროს არა სკამზე, არამედ მოედანზე უნდა ატარებდეს.
ქართველი ფეხბურთელი ამის მიზეზს დეტალურად განმარტავს და ფიქრობს, რომ მწვრთნელის გადაწყვეტილება ობიექტურია.
„ისტორიაში პირველად, ევროპის ჩემპიონატზე რომ ხარ, საქართველოს ნაკრებთან ერთად შენი ქვეყნისთვის, ეგეც რა თქმა უნდა, ბედნიერებას განიჭებს. არ არსებობს ფეხბურთელი, რომელსაც თამაში არ უნდა და არც მე ვარ გამონაკლისი. 26 კაცი, რომელიც სასტარტო შემადგენლობაში იყო, ყველას უნდოდა თამაში. არ დამიწყია არც ერთი თამაში, მაგრამ რამდენიმე წუთი მივიღე, მაშინაც ვთქვი, რომ ამით ბედნიერი ვარ. იმიტომ, რომ სტატისტიკაში, ჩემს კარიერაში წერია, რომ ევროპის ჩემპიონატზე ვითამაშე.
ასეთ სიტუაციებს სხვისი თვალით ვუყურებ – იქ იყვნენ ფეხბურთელები, რომლებსაც ერთი წუთითაც არ უთამაშიათ, მე ამის ბედნიერება მომეცა, მინიმუმ, 1 წუთი მაინც გამეტარებინა მოედანზე, ევროპის ჩემპიონატზე, საქართველოს სახელით. ამიტომ იყო ის განწყობა შენარჩუნებული, რაც მქონდა,“ – აღნიშნავს ფეხბურთელი.
ბუდუს თქმით, რომ ეროვნულ ნაკრებში ვილი სანიოლთან ამ თემაზე არასდროს უსაუბრია, რადგან საჭიროდ არ ჩათვალა.
„ვილისთან საუბარი არ მქონია. კარლსრუეს მწვრთნელთან რამდენჯერმე მქონდა მსგავსი დიალოგი, დადებითადაც უმოქმედია, მაგრამ ეს ნაკრებში საჭიროდ არ ჩამითვლია.
რადგან მწვრთნელმა ასე გადაწყვიტა, მისი გადმოსახედიდან, ასე იყო სწორი. შედეგიც იყო, ამიტომ ვერაფერს მოსთხოვ. სულ წინ ვიყურები, ეს სეზონიც მეტი შემართებით დავიწყე. როგორც ყველა ფეხბურთელს, მსურს, რომ უფრო მეტი და მეტი გავაკეთო. ახლა ძალიან კარგ კონდიციაში და ფორმაში ვარ. ყველაფერს ვაკეთებ, რომ ასე გავაგრძელო. მომავალში იმედი მაქვს, რომ უფრო მეტი სათამაშო დრო მომეცემა“- ამბობს ბუდუ ზივზივაძე