“ტრანსპორტმა მიმტყუნა, ვინც მოპედს მართავს, იცის რაზეც ვსაუბრობ, ახალი გადაწყობილი მქონდა მუხრუჭი, – ამის შესახებ ჟურნალისტების მიმართ განხორციელებული ფიზიკური ძალადობისა და პროფესიულ საქმიანობაში უკანონოდ ხელის შეშლის ფაქტზე ბრალდებულმა ზაზა ჭაავამ გუშინ განაცხადა. სწორედ აღნიშნული პირი მართავდა მოპედს, რომელიც ჟურნალისტებში შევარდა.
“ჩემს მოძღვარს მოვკარი თვალი და მასთან პურის მისატანად მივდიოდი, გამექცა მოტოციკლი, ვიგინებოდი და ვყვიროდი, რადგან მივხვდი, რომ ვერ ვაჩერებდი”– თქვა დაკავებულმა.
აღნიშნულ განცხადებას ჟურნალისტი ვახო სანაია “ფეისბუქის” პირად გვერდზე ასე ეხმარება:
“სინამდვილეში რა ჩმორები არიან. ჩემზე თავდამსხმელებიც ზუსტად ასე უტიფრად ჰყვებოდნენ ზღაპრებს. კადრები რომ დავუდეთ, მერე ბოდვაში გადაიზარდა მათი ,,თხრობა”.
გალიაში რომ აღმოჩნდებიან, მერე იხვეწებიან, გამოგვიშვითო. საგუნდაოდ ვიყავით ჩასულიო. თუ გააკეთე, თქვი, შე არაკაცო. აღიარე მაინც, მაგრამ ვინ მოგცა მაგის ერთი ადგილი. ვიდეომასალაა, რომელიც მთელმა ქვეყანამ ნახა!” – წერს ვახო სანაია სოციალურ ქსელში.
უკანონოდ ხელის შეშლის ფაქტზე ბრალდებულმა ზაზა ჭაავამ განაცხადა, რომ მისი მიზანი ჟურნალისტების დაზიანება და საქმიანობაში ხელის შეშლა არ ყოფილა.
“”ჩემ მეუღლეს ჟურნალისტიკა აქვს დამთავრებული და ასე თუ ისე შეხება აქვს ამ სფეროსთან, დედა მყავს ავადმყოფი და წამლებს ვაწვდი ყოველდღიურად. მარცხენა ხელი არ მაქვს და ავარიის შედეგად მარჯვენა ფეხი არ მაქვს, ძვლების ნაცვლად რაღაც მიზის. სადაც ჟურნალისტებში შევვარდი ჩემი მიზანი მათი დაზიანება არ იყო. ტრანსპორტმა მიმტყუნა, ვინც მოპედს მართავს, იცის რაზეც ვსაუბრობ, ახალი გადაწყობილი მქონდა მუხრუჭი, ჩემ მოძღვარს მოვკარი თვალი და მასთან პურის მისატანად მივდიოდი, გამექცა მოტოციკლი, გაზიც გაიჭედა, ვიგინებოდი და ვყვიროდი, რადგან მივხვდი, რომ ვეღარ ვაჩერებდი, შევარდნისას რატომღაც ერთ-ერთი ოპერატორი წიხლებით შემომახტა მკერდზე, რადგან ისევ გაზს მივაწექი, იქნებ აიშვას-მეთქი. თუ ეს ხალხი თვლის, რომ მე ვიძალადე ჟურნალისტებზე და ასე მწირავენ, მე მაინც საზოგადოებას ბოდიშს მივუხდი ამისთვის. თუ რომელიმე ჟურნალისტი თვლის, რომ ვიძალადე, ამაზე ვაგებ პასუხს. მე არ ვარ ჟურნალისტების მიმართ აგრესიული. რაც შეეხება ლგბტ მსვლელობას და მათი თანაცხოვრების საქართველოში დაფუძნებას, არ ვემხრობი, ქრისტიანი ვარ”,- განაცხადა ჭაავამ ჩვენებაში.