5 ივლისი ხელისუფლების კარგად დაგეგმილი სპეცოპერაცია იყო, სადაც წაეწევით მედიის წარმომადგენლებს, მიდით ბიჭებო – ამის შესახებ ჟურნალისტმა ინგა გრიგოლიამ “მთავარ არხთან” საუბრისას განაცხადა, რომელიც გუშინ ჟურნალისტების სოლიდარობის აქციაზე, მთავრობის ადმინისტრაციასთან იმყოფებოდა.
ჟურნალისტი სრულ პასუხისმგებლობას მთავრობის მეთაურსა და მის გუნდს აკისრებს.
“მე ვაკისრებ პასუხისმგებლობას მათ, ვინც მთავრობის ადმინისტრაციაში სხედან, პრემიერ-მინისტრის ხელმძღვანელობით. 100%-ით ვარ დარწმუნებული, რომ ეს იყო ხელისუფლების მიერ დაგეგმილი სპეცოპერაცია ჟურნალისტების წინააღმდეგ.
ძალიან კარგად იცის ხელისუფლებამ, რომ მედიას ვერ გააჩუმებს, მაგრამ მთავარი გზავნილი, რაც მათ წინასაარჩევნოდ გამოუშვეს არის ის: სადაც წაეწევით ჟურნალისტებს, სადაც დაინახავთ მიკროფონიან და კამერიან ადამიანებს, სცემეთ, ურტყით წიხლები, მიაყენეთ შეურაცხყოფა. აი, ეს გზავნილი გაუშვა ხელისუფლებამ თავისი მომხრეებისთვის და დასაშვები გახადა ფიზიკური ანგარიშსწორება”, – განაცხადა გრიგოლიამ “მთავართან” კომენტირებისას.