ქუთათელ-გაენათელი მიტროპოლიტი მამა იოანე (გამრეკელი) ბავშვზე ძალადობას ამართლებს და არგუმენტად მოსეს რჯულიდან ამონარიდი მოჰყავს, რომელიც ურჩ შვილებს ეხება.
“აბა, ახლა გაბედე და დატუქსე ბავშვი, უყვირე, კუთხეში დააყენე… რეკავს ეგრევე პოლიციაში – “დედა ჩემს უფლებებს ლახავს”, ” მამა მიყვირის”. მოდის პოლიცია და აფრთხილებს, კიდევ ერთხელ ზარი გამოვა და ბავშვს წაგართმევთ თქვენო. ასეთი არსად არ ყოფილა. მოსეს რჯულში პირდაპირაა ნათქვამი, ურჩი შვილი, რომელიც არ უსმენს თავის მშობელს და არც არავის არ უსმენსო, გაიყვანეთ გარეთ და ჩაქოლეთო”, – აღნიშნულზე მიტროპოლიტმა ქადაგებისას ისაუბრა.
მას ასევე აღნიშნა, რომ ბავშვი მორჩილებაში უნდა იყოს.
მიტროპოლიტის განცხადებას, თბილისის ყოფილი მერი გიგი უგულავა “ფეისბუქის” პირად გვერდზე ეხმაურება და მას მიმართავს:
“და უძღებ შვილს რა უნდა უქნა? სახარებიდან რამე ხომ არ გახსენდებათ მეუფეო?
მეუფევ! “ურჩი ბავშვის” ჩაქოლვაზე კურთხევას გასცემთ! გიჯობთ ლოდი გეკიდოთ კისერზე და წყალში ხტებოდეთ. გეენა სამოთხედ მოგეჩვენებათ. ახლა მივხვდი თურმე თქვენისთანებზეა ნათქვამი – განვეშორები ეშმაკისაგან და ყოველთა საქმეთა მისთაგან,” – წერს უგულავა სოციალურ ქსელში.