„თბილისში, შუქნიშნებთან დამონტაჟდება ვიდეოკამერები, რომლებიც მანქანების გამონაბოლქვს გააკონტროლებს და ჯარიმებს გამოწერს“, – ამის შესახებ მოძრაობის „ჩემი ქალაქი მკლავს“ დამფუძნებელმა გიორგი ჯაფარიძემ „ბიზნესპრესნიუსთან“ განაცხადა.
მისი თქმით, შესაბამისი ცვლილებები თბილისის ატმოსფერული ჰაერის ხარისხის მართვის 2024-2026 წლების სამოქმედო გეგმაში გაიწერა.
როგორც მან აღნიშნა, გეგმის მიხედვით, ასევე გამკაცრდება კონტროლი სამშენებლო მტვრის შემცირების მიმართულებით, მერიის შესაბამის სამსახურს დაემატება ქუჩების მორეცხვისთვის საჭირო სპციალური მანქანები და მნიშვნელოვნად გაიზრდება გამწვანებული ტერიტორიების ფართობი.
„გამონაბოლქვის კონტროლის მიმართულებით, გეგმაში გაიწერა, რომ თბილისის მასშტაბით უნდა დამონტაჟდეს 3 კამერა შუქნიშნებთან, რომლებიც მანქანის დაძვრის დროს ავტომატურად გაზომავს გამონაბოლქვში მავნე ნივთიერებების დონეს და ჯარიმას გამოწერს. ეს კამერები იქნება მოძრავი და პერიოდულად შეიცვლება მათი ლოკაციები“, – აღნიშნა გიორგი ჯაფარიძემ.