დმანისისა და აგარაკ-ტაშირის, დიდი ბრიტანეთისა და ირლანდიის მთავარეპისკოპოსი ზენონ იარაჯული სოციალურ ქსელში წერს.
“ცხედრები, მკვლელობები, ცხედრებიდღენიადაგ! აი,სიძულვილით და სისასტიკით ნასაზრდოები ღატაკი ინდივიდუალური თუ “კოლექტიური სულის” შემოქმედება. ვინც სიძულვილის მომაკვდინებელ უღელს გაურიგდით და დაიდგით და ფიქრობთ, რომ საამურად მოეწყობით “მოარულ ცხედართა” სასაფლაოზე, იქნებ შეჩერდეთ სიცოცხლისთვის და დარჩეთ ადამიანებად. ადამიანურობის გამოვლენა თქვენს ძალას აღემატება?! თუ საკუთარ სიცოცხლეს პატივს ჰსცემთ, სხვისი სიცოცხლე რატომ არ გიღირთ არაფრად?! ჩვენ ვართ ქვეყანა, რომელიც ყალბი ბრწყინვალებით იმოსება და რომლის მოჩვენებითი ბრწყინვალების ქვეშ ადამიანი თანდათან ქრება”- წერს ზენონ იარაჯული.
შეგახსენებთ, 18 სექტემბერს ავთანდილის ქუჩაზე მდებარე საცხოვრებელ სახლში ტრანსგენდერი ქალი, მოდელი კესარია აბრამიძე სასტიკად მოკლეს. მკვლელობაში ბრალდებული კესარიამ მეგობარი მამაკაცი, ბექა ჯაიანი უკვე დაკავებულია. შსს–ის ინფორმაციით, კესარია აბრამიძე დანითაა მოკლული. მას სხვეუკზე 50 ჭრილობა აღენიშნებოდა.
თავდაპირველად გამოძიება დაიწყო განზრახ მკვლელობის მუხლით (სისხლის სამართლის კოდექსის 108-ე მუხლით), მოგვიანებით კი კვალიფიკაცია დამძიმდა. შსს-ს ცნობით, გამოძიება გრძელდება სისხლის სამართლის კოდექსის 109-ე მუხლის „თ“ და „მ“ პუნქტებით – გენდერის ნიშნით განსაკუთრებული სისასტიკით დამამძიმებელ გარემოებაში ჩადენილი განზრახ მკვლელობისთვის. დანაშაული 16-დან 20 წლამდე ან უვადო თავისუფლების აღკვეთას ითვალისწინებს.