შინაგან საქმეთა სამინისტროს საპატრულო პოლიციის დეპარტამენტის დირექტორმა, ვაჟა სირაძემ თბილისში „პრაიდის“ კვირეულის ფარგლებში დაგეგმილი ღონისძიების უსაფრთხოების ზომებთან დაკავშირებით ჟურნალისტებთან განცხადება გააკეთა.
მისი თქმით, ვახუშტი ბაგრატიონის ხიდის მიმდებარე ტერიტორიაზე მობილიზებული არიან სამართალდამცავი ორგანოების წარმომადგენლები, რომლებიც საზოგადოებრივ წესრიგს იცავენ.
„კიდევ ერთხელ მოვუწოდებთ ყველას, დაემორჩილონ პოლიციის კანონიერ მოთხოვნას, არ დაარღვიონ კანონი, ყველას აქვს სიტყვისა და გამოხატვის უფლება, როგორც ერთ, ასევე მეორე მხარეს. ასევე ჩვენ კიდევ ერთხელ მოვუწოდებთ მათ, არ გასცდნენ კანონის, სიტყვისა და გამოხატვის თავისუფლების ჩარჩოებს და თავიანთი პროტესტი გამოხატონ მშვიდ ვითარებაში.
კიდევ ერთხელ განვმარტავ, ნებისმიერი ფაქტი, სამართალდამცველზე თავდასხმის ან შეურაცხყოფის, მკაცრად იქნება დასჯილი. მკაცრად მოვუწოდებ ყველას, იმოქმედონ კანონის შესაბამისად, თავიანთი უფლებები გამოხატონ კანონის ჩარჩოებში“, – განაცხადა ვაჟა სირაძემ.
ღონისძიების ადგილზე ვითარება პერიოდულად იძაბება. რამდენიმე წუთის წინ, აქტივისტების გარკვეული ჯგუფი წამოვიდა მსვლელობით ტერიტორიისკენ და მათ გზის სავალი ნაწილი დაიკავეს. პოლიციამ გზის სავალი ნაწილიდან მათი გადაყვანა დაიწყო, რასაც ფიზიკური დაპირისპირება მოჰყვა.
შეგახსენებთ, რომ 7 საათზე “თბილისი პრაიდის” ფარგლებში დაგეგმილი პირველი ღონისძიება – დახურული კინოჩვენება უნდა გაიმართოს.