“10 წელია კესარიას ვიცნობ – რომ გცოდნოდათ როგორი ბავშვური, მიამიტი და უბრალო ადამიანი იყო ცხოვრებაში, კიდევ უფრო განიცდიდით ამ საშინელ ამბავს. ჩამოხსნიდა თავის ტანსაცმელებს და ხან ვის ჩუქნიდა, ხან ვის. მე რაც მახსენდება, მინიმუმ 15-ჯერ მაინც მიუღია მონაწილეობა უმწეო ოჯახების დახმარებაში. გამოკითხეთ ყველა, ვინმეს თუ ახსოვს ამ გოგოსგან რამე ცუდი. ამდენი წელი, ამდენი რამე გამოიარა, არ გაბოროტებულა ამ ხალხთან გამკლავებით – მეგონა ერთადერთი იყო ამ ქვეყანაში, რომელმაც სიძულვილზე გაიმარჯვა ამდენ ზიზღს შორის და აჰა, მოკლეს. ჩვენი ხელისუფლება, რომელიც სიძულვილს აქეზებს, ათასგზის პასუხისმგებელია ამ განუკითხაობაზე. ახლაც დაეგდეთ ტრიბუნებთან და აფრქვიეთ ჰომოფობია ხმებისთვის. მალე უნდა დასრულდეს ამ ქვეყანაში ეს საშინელება!”- წერს მანგო სოციალურ ქსელ ფეიზბუქზე
კესარია აბრამიძე 18 სექტემბერს საკუთარ სახლში გარდაცვლილი იპოვეს. მას 50-მდე ჭრილობა დანით მიაყენეს. ამ დროისთვის ეჭვმიტანილი დაკავებულია და იმყოფება დაკითხვაზე.