დღეს, 16 სექტემბერს რუსული კანონის საპროტესტო აქციაზე პარლამენტთან მდებარე სათვალთვალო კამერის დაზიანებისთვის დაკავებული გიორგი შანიძის დასკვნითი სასამართლო გაიმართა, სადაც მას 4-წლიანი პატიმრობა მიუსაჯეს.
შანიძე მიმდინარე წლის 8 მაისს დააკავეს. მას სასამართლო სისხლის სამართლის კოდექსის 187-ე მუხლით ედავებოდა, რაც სხვისი ნივთის დაზიანებას ან განადგურებას გულისხმობს.
„კოალიცია ცვლილებებისთვის“ მიიჩნევს, რომ აქციებზე დაკავებულიბშანიძე, შერჩევითი მართლმსაჯულების მსხვერპლი და პოლიტიკური პატიმარია, რომელიც საქართველოს მომავალს იცავდა.
„კოალიცია ცვლილებებისთვის“ განცხადებას ავრცელებს და გიორგი შანიძის გათავისუფლებას მოითხოვს.
„რუსული კანონის“ საწინააღმდეგო აქციებზე უკანონოდ დაკავებულ გიორგი შანიძეს ივანიშვილის სასამართლომ 4 წლით თავისუფლების აღკვეთა მიუსაჯა. გიორგი შანიძე არის შერჩევითი მართლმსაჯულების მსხვერპლი, პოლიტიკური პატიმარი, რომელიც საქართველოს ევროპულ, თავისუფალ მომავალს იცავდა. 26 ოქტომბერს, ცვლილებით უნდა გათავისუფლდეს ყველა პოლიტიკური პატიმარი და შევქმნათ თავისუფალი, სამართლიანი სასამართლო სისტემა, რომელიც ქვეყნისა და ხალხის ინტერესებს მოემსახურება. თავისუფლება პოლიტპატიმარ გიორგი შანიძეს!“, – აღნიშნულია განცხადებაში.