საქართველოს ექს-პრეზიდენტი მიხეილ სააკაშვილი პრემიერ-მინისტრ ირაკლი ღარიბაშვილის იმ განცხადებებს გამოეხმაურა, რომლის მიხედვითაც, “ნაციონალური მოძრაობის” მმართველობის პერიოდში ევროინტეგრაციის პროცესი შეჩერებული იყო.
“თქვენ ეხლა ესაუბრებით მიხეილ სააკაშვილს. მე მაქვს ისტორიული როლი ნათამაშები ევროპის ისტორიაში – ვარ ერთერთი ინიციატორი აღმოსავლეთ პარტნიორობის შექმნისა. ჩვენს დროს ჩაეყარა საფუძველი ევროპასთან უვიზო მიმოსვლას და ვაი, რომ ეს გავაფორმე, ვნანობ და თითზე ვიკბენ. სხვანაირად წარმომედგინა. წარმომედგინა, რომ საქართველო იქნებოდა სწრაფად განვითარებადი, მაღალშემოსავლიანი ქვეყანა და ქართველები ივლიდნენ ტურისტებად და არა მარწყვის მკრეფავებად და ტალახში ამოსაგანგლად გერმანიაში. მე ქართველი არც გერმანელის მონად არ მინდა, არც თურქის და არც რუსის. მე მინდა რომ საქართველო იყოს მდიდარი ქვეყანა და დღეს უვიზო მიმოსვლას იყენებენ მხოლოდ იმისათვის, რომ საქართველო აქციონ უფასო მუშა ხელის ექსპორტიორად, ამას აკეთებს პირველ რიგში ივანიშვილი…
როცა საქართველომ მიიღო ასოცირების ხელშეკრულება, ევროპარლამენტმა მიმიწვია გასამართლებული ყოფილი პრეზიდენტი საზეიმო სხდომაზე, სადაც ჩამოსული იყო საქართველოს დელეგაცია მარგველაშვილის ხელმძღვანელობით, რომელმაც ხმა არ გამცა. დამსვა ევროპარლამენტმა იმ ხელისუფლების გვერდზე, რომელმაც გამასამართლა და როცა გამოაცხადეს, რომ დარბაზში არის სააკაშვილი, მთელი ევროპარლამენტი ადგა და ტაში (დამიკრა0. მე არ გავაკეთე არაფერი ევროპული ინტეგრაციისთვის და ანტუანი, თუ ანტუანეტა, თუ რაც ჰქვია, ამან გააკეთა რამე? ხო, ყველაფერს რაღაც საზღვარი აქვს?” – განაცხადა სააკაშვილმა ტელეკომპანია “პირველის” გადაცემაში „საჯარო პოლიტიკა”, ჟურნალისტ ეკა მიშველაძის კითხვის საპასუხოდ.
სააკაშვილის აღნიშნულ განცხადებას კი, კერძოდ “მე მაქვს ისტორიული როლი ნათამაშები ევროპის ისტორიაში”, ჟურნალისტი, “ევროპული საქართველოს” ლიდერის მეუღლე თამარა ჩერგოლეიშვილი ეხმაურება:
“ყველაფერი თვითონ თქვა თავის თავზე რაც სხვას უნდა ეთქვა. ასეთი სუსტი და სასოწარკვეთილი არაფერი მინახავს”,- დაწერა ჩერგოლეიშვილმა “ფეისბუქის” პირად გვერდზე.