ოლიმპიური და პარაოლიმპიური სპორტის ისტორიაში უნიკალური შემთხვევა- ცოლ-ქმარი, გიორგი და ინა ქალდანები, ერთ დღეს ორი მედლის, ვერცხლისა და ბრინჯაოს მფლობელი გახდა.
აღსანიშნავია, რომ ინა მეორე ქართველი პარაათლეტი გახდა, ვინც მედლის მოპოვება ორ პარაოლიმპიადაზე შეძლო.
ინა ქალდანის ისტორია, ასევე, იმით არის მნიშვნელოვანი და სამაგალითო, რომ ის ტოკიოს 2020 წლის ოლიმპიური თამაშების წინ გახდა დედა და მაშინ ტოკიოს ვიცე-ჩემპიონობა დამიანე ქალდანს მიუძღვნა.
“გიორგი და ინა ქალდანების ისტორიას უნდა იცნობდეს ყველა – ჩვენი პარასპორტსმენები მეუღლეები არიან, მათ ჰყავთ პატარა დამიანე. ინას შვილის გაჩენის შემდეგ აქტიური სპორტიდან დროებით წასვლა მოუწია, მაგრამ დაბრუნდა სპორტში და დღეს პარაოლიმპიადის ვერცხლისპრიზიორია. ეს არის მაგალითი, როგორ შეიძლება ერთდროულად იყო წარმატებული ქალი – დედა და სპორტსმენი!
გიორგი ტოკიო 2020-ზე ნახევარფინალში გავიდა, საბოლოოდ კი მეხუთე ადგილს დასჯერდა, რაც, უდავოდ, უდიდესი წარმატებაა. ყველამ ვიცით, მათ გაცილებით მეტი შეუძლიათ და ერთად ბევრს ვიმუშავებთ, რომ კიდევ უფრო მეტად ვასახელოთ ჩვენი ქვეყანა და დამიანე ქალდანი”, – წერდა 2021 წელს საქართველოს პარაოლიმპიური კომიტეტი ქალდანების შესახებ.
გიორგი და ინა ქალდანები უკვე არაერთი წელია, წარმატებით ასპარეზობენ სხვადასხვა სპორტულ შეჯიბრებაზე და გულშემატკივარს სიხარულისა და სიამაყის მიზეზს აძლევენ, თუმცა მათი ისტორია ცოტამ თუ იცის.
რამდენიმე წლის წინ, როცა გიორგისა და ინას მხედველობის პრობლემები შეექმნათ, მათ პარასპორტში გადაინაცვლეს. სწორედ სპორტმა აპოვნინა მათ ერთმანეთი და ასე დაიწყო მათი სიყვარულის ისტორიაც, რომელიც მალევე დაგვირგვინდა ქორწინებით. ინას და გიორგის ერთი ვაჟი შეეძინათ, რომელსაც დამიანე დაარქვეს და ახლა მშობლები ყველა წარმატებას სწორედ მას უძღვნიან.
“პირველ არხთან” ინტერვიუში ინა ქალდანმა საკუთარი ცხოვრებისა და კარიერის შესახებ ვრცლად ისაუბრა:
“სულ ვვარჯიშობდი, მაგრამ 17 წლის რომ გავხდი და სკოლა დავამთავრე, უნივერსიტეტში ჩავაბარე და სპორტისთვის დროს აღარ მქონდა. შემდეგ, როცა ოჯახი შევქმენი და დამიანე გაჩნდა, ვალდებულებებიც გაიზარდა, მაგრამ არის მომენტები, როცა ოჯახზეც კი უნდა დახუჭო თვალი. ისევ იმისთვის აკეთებ ამ ყველაფერს, რომ სამომავლოდ ბავშვზე აისახოს წარმატებული მშობლის ყოლა. შეჯიბრებიდან რომ ვბრუნდები, დამიანეს პირველი კითხვაა – აბა, ჩამომიტანე მედალი?” – ამბობდა ინა ქალდანი.
გიორგი ქალდანი მეუღლის დიდი გულშემატკივარია და მისი წარმატება ყოველთვის საკუთარივით ახარებს. მისი მთავარი მოტივატორი კი მამაა:
“ყველა მიღწეული წარმატება ჩემს თავზე გამარჯვებაა, რაც სულ მახსენებს მამას. ეს რომ ენახა, უბედნიერესი ადამიანი იქნებოდა. მეც თავს მის გვერდით ბედნიერად ვიგრძნობდი. ამ თემაზე საუბარიც მიჭირს. პირველ კლასში ვიყავი, როცა მამამ ძიუდოზე მიმიყვანა. ვიცოდი, რომ მამა სპორტზე იყო შეყვარებული.
ერთად დავდიოდით ვარჯიშზე, მოტივაციას მაძლევდა, ერთ-ერთი შეჯიბრების დროს ფინალში გავედი, ძალიან გაუხარდა და სწორედ მაგ დღეს ძალიან ცუდი ფაქტი მოხდა. ფინალში რომ გავედი, ხელში ამიყვანა, უხაროდა. მოულოდნელად შეუძლოდ გახდა და იქვე, ტატამზე, ჩემ თვალწინ გული გაუსკდა. ჩემთვის ეს დიდი ტრავმა იყო” – თქვა გიორგიმ ინტერვიუში.
