რუსთაველის თეატრის დასის ხელმძღვანელი, რობერტ სტურუა “ფეისბუქის” პირად გვერდზე ფოტოსურათს აქვეყნებს შემდეგი წარწერით: – “დატკბით, ჯიგრებო, გამთათხეთ!“.
რობერტ სტურუა ირონიული სახის პოსტით სავარაუდოდ, საზოგადოების იმ ნაწილს მიმართას, ვინც რუსთაველის თეატრის დასის, რუსთაველის თეატრის სამხატვრო ხელმძღვანელთან ერთად მოსკოვში ჩეხოვის ფესტივალში მონაწილეობის მიღებას მწვავედ აკრიტიკებს.
მოსკოვის სცენაზე გამოსვლის მოწინააღმდეგეები საქართველოს 20%-ის ოკუპაციაზე ამახვილებენ ყურადღებას. მომხრეები კი კულტურასა და პოლიტიკას შორის ზღვარზე საუბრობენ.
“ჩვენთვის ძალიან სასიამოვნოა, რომ მოსკოველ მაყურებელს შეგვიძლია ვაჩვენოთ ჩვენი ერთ-ერთი ბოლო სპექტაკლი. არაჩვეულებრივი პიესაა, არაჩვეულებრივი ავტორი და ჩემი აზრით, მსახიობებიც ცუდად არ თამაშობენ”, – განაცხადა რობერტ სტურუამ.
თეატრის ერთ-ერთი მსახიობის, ნანა ფაჩუაშვილის თქმით კი, რუს მაყურებელზე იმედს ამყარებენ, რადგან მათ “მოსმენა უყვართ”.
“ახლა, როცა ასეთ რთულ პიესას ვთამაშობთ, იმედს რუს მაყურებელზე ვამყარებთ, რადგან რუს მაყურელს მოსმენა, დაფიქრება უყვარს”, – აღნიშნა მსახიობმა.
30 ივნისს, 1 და 2 ივლისს რუსთაველის თეატრის სპექტაკლს „თამაშის დასასრული“ “მოსსოვეტის” სცენაზე ელოდებიან. საქართველოს სახელმწიფო აკადემიური თეატრი მოსკოვში მიიწვია ანტონ ჩეხოვის სახელობის საერთაშორისო თეატრალურმა ფესტივალმა, რომელიც ძირითადად რუსეთის ხელისუფლების პატრონაჟით არსებობს. მგზავრობისა და მოსკოვში ყოფნის ხარჯებს მთლიანად რუსეთი ფარავს.