“ნაციონალური მოძრაობის” თავმჯდომარე ნიკა მელია “მთავარი არხის” გადაცემაში “მთავარი დებატები” მედიაში გავრცელებულ ინფორმაციას ეხმიანება, რომლის თანახმადაც, მასსა, მიხეილ სააკაშვილსა და ექს-პრემიერ გიორგი გახარიას შორის ვაშინგტონში კონსპირაციული შეხვედრა შედგა.
მელიამ ინფორმაციას “მორალურად დაცემის მაგალიების კორიანტელი” უწოდა. მისივე თქმით, გიორგი გახარიამ იმ სასტუმროში დაიდო ბინა, სადაც ენმ-ს წევრები იყვნენ გაჩერებულები, ამის შესახებ კი არაფერი იცოდა, ხოლო როცა გაიგო, მალევე სხვაგან გადავიდა. მელია ამბობს, რომ ამერიკაში ყოფნისას ყოფილი პრემიერი არ უნახავს.
“ათასი სპეკულაცია მესმის, დაახლოებით ოთხი დღის დაწყებული გვქონდა შეხვედრები მე, ნონა მამულაშვილსა და თიკა ბოკუჩავას, მიხეილ სააკაშვილი ჯერ არც კი იყო ამერიკის შეერთებულ შტატებში, როდესაც გავიგე, რომ სასტუმროში, რომელშიც ჩვენ ვცხოვრობდით შემოსახლებულა ბატონი გახარია, ისე რომ მას ეს ინფორმაცია არ ჰქონდა და იმ სართულზე დაიდო ბინა, რომელზეც მე ვიყავი, მეხუთეზე, ერთ სართულზე ვყოფილვართ. მალევე გაიგო, რომ ჩვენ იქ ვიყავით და მეორე დღეს, დილით ადრე სასტუმროდან გავიდა და გადავიდა სხვაგან”, – განაცხადა ნიკა მელიამ თამარ ბაღაშვილთან ინტერვიუში.