გარდაცვლილი ამერიკელი მსახიობის მეთიუ პერის ერთ-ერთმა ექიმმა აღიარა, რომ ის მას პრეპარატ კეტამინით უკანონოდ ამარაგებდა. ინფორმაციას ABC News-ი პროკურორის განცხადებაზე დაყრდნობით ავრცელებს.
„ექიმმა მარკ ჩავესმა თანხმობა განაცხადა, რომ ეღიარებინა ბრალი ბრალდების ერთ-ერთი პუნქტის მიხედვით, რომელიც კეტამინის გავრცელების მიზნით შეთქმულებას ეხება, და შეთანხმებას ბრალის აღიარების შესახებ ხელი მოაწერა“, – ციტირებს ტელეარხი საქმის პროკურორს.
პროკურორის თქმით, ბრალდებული ექიმი „წარმოუდგენელ სინანულს“ განიცდის იმის გამო, თუ რა წვლილიც მიუძღვის მას მსახიობის გარდაცვალებაში. ჩავესი აგრეთვე დათანხმდა დაუყოვნებლივ უარი თქვას თავის საექიმო ლიცენზიაზე. ექიმ ჩავესს 10 წლამდე პატიმრობა ემუქრება.
2023 წლის 28 ოქტომბერს, 54 წლის მსახიობი გარდაცვლილი საკუთარ სახლში, ჯაკუზიში აღმოაჩინეს. სერიალ „მეგობრების“ ვარსკვლავი კეტამინის მწვავე ზემოქმედების შედეგად გარდაიცვალა. მოგვიანებით მსახიობის გარდაცვალების საქმეზე სამართალდამცველებმა ხუთი პირი დააკავეს, მათ შორისაა ექიმი მარკ ჩავესი.