ცოლისა და 2 მეგობრის მკვლელობაში ბრალდებულს აღკვეთის ღონისძიების სახით ორთვიანი წინასწარი პატიმრობა შეეფარდა. გადაწყვეტილება თელავს რაიონული სასამართლოს მოსამართლე თამარ კაპანაძემ მიიღო და სრულად გაიზიარა პროკურატურის შუამდგომლობა.
რაც შეეხება დაცვის მხარეს – ადვოკატი არ დაეთანხმა ბრალდების არგუმენტებს, რომ არსებობდა ხელახალი დანაშაულის ჩადენის, მიმალვის, ან მტკიცებულებების განადგურების საფრთხე, თუმცა მას არანაირი შუამდგომლობა არ დაუყენებია.
პროცესს ესწრებოდა თავად ბრალდებული ზურაბ ზურაბაშვილიც,რომელმაც დანაშაული აღიარა და თქვა, რომ ახლაც “იგივეს გააკეთებდა”.
მან მოტივზეც ისაუბრა.
„მე პოზიციას დავაფიქსირებ. ახლაც რომ ცოცხლები იყვნენ, ისევ დავხოცავდი. ჩემმა საყვარელმა მეუღლემ და მეგობარმა ერთმანეთთან ურთიერთობა დაიჭირეს. ეს ყველაფერი მე მოვისმინე. ახლა რაღა აზრის აქვს რამეს?! ჯერ ცოლს ვესროლე და შემდეგ მეგობრებს”, – თქვა ბრალდებულმა ზვიად ზურაბაშვილმა.
წინასასამართლო სხდომა 22 ოქტომბერს ჩაინიშნა.
შეგახსენებთ, მკვლელობა გურჯაანის მუნიციპალიტეტის სოფელ ახაშენში, 28 აგვისტოს მოხდა.
არსებული ინფორმაციით, ზვიად ზურაბაშვილმა ცოლი და ბავშვობის ორი მეგობარი ცეცხლსასროლი იარაღით, ეჭვიანობის ნიადაგზე მოკლა.
ზურაბაშვილს ბრალდება, საქართველოს სისხლის სამართლის კოდექსის 11 პრიმა 109-ე მუხლის „თ“, „კ“, „ლ“ და „პ“ ქვეპუნქტებით (განზრახ მკვლელობა დამამძიმებელ გარემოებებში – გენდერის ნიშნით, ოჯახის წევრის, სამი პირის მიმართ და არაერთგზის) წარედგინა, რაც სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.