წელს უმაღლეს სასწავლებელში სწავლის გაგრძელების უფლება32 000-ზე მეტმა აბიტურიენტმა მოიპოვა. ამიტომ, ბევრ მათგანს აინტერესებს, როდიდან შეძლებენ სტუდენტური ბარათის აღებასა და ტრანსპორტში შეღავათებით სარგებლობას.
საქართველოში სტუდენტები საქართველოს ბანკის სტუდენტური ბარათით ტრანსპორტით შეღავათიან ფასად მგზავრობენ და სხვა არაერთ შეთავაზებას იღებენ.
Student Card-ით სარგებლობის უფლება უმაღლესი აკრედიტირებული სასწავლებლების სტუდენტებს აქვთ. თბილისში მგზავრობის გადასახადი, სტუდენტური ბარათის გამოყენებით, სტანდარტული 1 ლარის ნაცვლად, 20 თეთრია.
იაფი ტარიფით თბილისის გარდა, ბათუმის, რუსთავის ან ზუგდიდის აკრედიტირებული უნივერსიტეტის / პროფესიული კოლეჯის სტუდენტებიც ისარგებლებენ.
ბარათის შესაკვეთად პირადობის მოწმობა დაგჭირდებათ. თუ სატრანსპორტო შეღავათებით გინდათ სარგებლობა, მაშინ აუცილებელია, აქტიური სტუდენტის სტატუსი გქონდეთ.
ბარათი შეკვეთიდან 5 სამუშაო დღეში მზადდება. მისი დამზადება უფასოა. ხოლო, დაკარგვის შემთხვევაში, აღდგენის ღირებულება 3 ლარს შეადგენს.
მისი შეკვეთა შეგიძლიათ, როგორც ფილიალებში, ასევე მობაილბანკის მეშვეობით.
აღსანიშნავია, რომ ტრანსპორტში ბარათის გატარების შემდეგ, მომდევნო 1,5 საათი უფასოდ იმგზავრებთ.
როგორც საქართველოს ბანკში აცხადებენ, ბარათის შეკვეთის უფლება სტუდენტებს მას შემდეგ ექნებათ, რაც სასურველ უნივერსიტეტში დარეგისტრირდებიან, სტუდენტის სტატუსს მიიღებენ და კონკრეტული უნივერსიტეტი მათ მონაცემებს ბანკის ბაზას გადაუგზავნის. თარიღები კი, უნივერსიტეტების მიხედვით, ინდივიდუალურია.