“ძალიან ამაღლებული შეგრძნებაა, როცა შეგიძლია შენი ქვეყანა ასახელო, უმაღლეს საფეხურზე აიტანო შენი ჰიმნი და დროშა” – ამის შესახებ ოლიმპიურმა ჩემპიონმა გენო პეტრიაშვილმა, ქართველი ოლიმპიელების საზეიმო დახვედრის ცერემონიაზე ჟურნალისტებს განუცხადა.
„დღესაც ემოციების პიკში ვართ იმიტომ, რომ ჩვენ სპორტსმენებს გვეძლევა შესაძლებლობა ჩვენი ქვეყნის დროშა უმაღლეს საფეხურზე ავწიოთ, თუნდაც ვცადოთ ეს ყველაფერი და ეს არის ძალიან მაგარი, ამაყებს გვხდის და ძალიან ამაღლებული შეგრძნებაა, როცა შეგიძლია შენი ქვეყანა ასახელო, უმაღლეს საფეხურზე აიტანო შენი ჰიმნი და დროშა,“ – აცხადებს ოლიმპიური ჩემპიონი გენო პეტრიაშვილი.
ცნობისთვის, 10 აგვისტოს ქართველი თავისუფალი სტილით მოჭიდავე გენო პეტრიაშვილი (-125 კგ) ოლიმპიური ჩემპიონი გახდა.
პარიზის 2024 წლის ოლიმპიურ თამაშებზე საქართველომ სამი ოქროს, სამი ვერცხლისა და ერთი ბრინჯაოს მედალი მოიპოვა. უფრო კონკრეტულად, ოქროს მედლების მფლობელები გახდნენ გენო პეტრიაშვილი, ლაშა ტალახაძე და ლაშა ბექაური.
ოლიმპიადაზე ვერცხლის მედალი ტატო გრიგალაშვილმა, ილია სულამანიძემ და გივი მაჭარაშვილმა მოიპოვეს. რაც შეეხება ბრინჯაოს, მისი მფლობელი ლაშა გურული გახდა.