გეოლოგიური საფრთხეების შემსწავლელი ლაბორატორია, რომელიც საქართველოს 2018 წელს ავსტრიაის დახმარებით გადაეცა, უმოქმედოდ, ამ დრომდე ტექნიკური უნივერსიტეტის შენობაშია დასაწყობებული. ლაბორატორიის ღირებულება 17 მილიონი ლარია, თანხის ნაწილი ავსტრიამ, ნაწილი კი სახელმწიფო ბიუჯეტიდან დაიფარა.
რატომ არის უმოქმედოდ ლაბორატორია – ამასთან დაკავშირებით ტექნიკური უნივერსიტეტის წარმომადგენელი აცხადებს, რომ ლაბორატორია არა საველე პირობებში, არამედ სასწავლო მიზნით გამოსაყენებლად არის განკუთვნილი, ლაბორატორიის გამოსაყენებლად საჭიროა სპეციალური სივრცე და აპირებენ რომ ამ მიზნით ტენდერი გამოაცხადონ.
“დასაწყობებულია, არ არის დაინსტალირებული, ეს ლაბორატორიული აღჭურვილობა მივიღეთ უკვე , სპეციფიკური შენობა-ნაგებობა სჭირდება. შენობა-ნაგებობის პროექტი დასრულებულია და მიმდინარეობს ტენდერის მომზადება. ჩართულია სასწავლო პროცესში, საექსპერტო საქმიანობაში, პროექტირების ეტაპზე, გავლენას ვერ ახდენს და წინასწარ რაიმეს ინფორმაციას ვერ გვაძლევს მოსალოდნელ სტიქიურ პროცესებთან დაკავშირებით,” – აცხადებს ტექნიკური უნივერსიტეტის წარმომადგენელი ბაქარ მაისურაძე.
ავსტრიული მხარის ჩართულობას ადასტურებს განათლების ყოფილი მინისტრი თამარ სანიკიძეც, მისი თქმით, მას ინფორმაცია არ აქვს, საბოლოოდ როგორ გამოიყენა უნივერსიტეტმა აღნიშნული ლაბორატორია.
“მე მახსოვს ასეთი თემა, იქ იყო ავსტრიული კომპანია, შეღავათიანი სესხზე იყო საუბარი, რომლის თავდებშიც სახელმწიფო ჩაუდგა. იყო წყლის თემა, ბუნებრივი რესურსების თემა. მაგრამ მერე უნივერსიტეტმა ეს როგორ გამოიყენა, ამასთან დაკავშირებით ინფორმაცია არ მაქვს,”- აღნიშნა თამარ სანიკიძემ.