ცნობილია ახალგაზრდების ვინაობა, რომელსაც სვანეთში მეორედღეა ეძებენ. დაკარგულები გოგიტა ფარჯიანი და გიორგი გვიჩიანი არიან. მათ სამძებრო სამუშაოებში ადგილობრვებიც ჩაერთვნენ.
სამაშველო ოპერაციაში სასაზღვრო პოლიციის ვერტმფრენის ჩართვა მეტეოროლოგიური პირობების გამო, ამ ეტაპზე ვერ ხერხდება.
აღნიშნულ განცხადებამდე დაკარგულების შესახებ ინფორმაცია სოციალურ ქსელში ანა წერედიანმა გაავრცელა:
“თავს ვიკავებდით ამ პოსტისგან – ისევ ახლობლების განერვიულება არ გვინდოდა.მაგრამ…მეხუთე დღეა ბიძაშვილს ეძებენ სვანეთის ტყეებში! მეხუთე დღეა უგზო-უკვლოდაა გაუჩინარებული ორი ახალგაზრდა. რით ვერ აფრინდა ვერტმფრენი და შესაბამისად აღჭურვილი დრონები აქამდე?! რით ვერ დაიწყო შესაფერისი ძებნა აქამდე?! ხუთი დღეა გასული და რა ვერტმფრენის ასაფრენად საჭირო ბიუროკრატიაზე და საბუთების მზადებაზეა საუბარი. ან რა ნისლია მაინცდამაინც იმ ტყის თავზე ასეთი, როცა მთელი სვანეთი უღრუბლოდაა?
ვურეკავ ბრიგადასთან ერთად საძებრად წასულ ჩემს ძმას და მიდასტურებს, რომ მთის იმ მხარეს, სადაც თვითონაა არანაირი ნისლი არაა! ჩალითაც არ ვართ გადახურულები?! ჩასაფრებულის პოზიციიდან მართლა არ ვწერთ (ან სად გვაქვს ამისი თავი). სამწუხაროდ, უძლურის და შეშინებულის პოზიციიდან ვწერთ და ვთხოვთ ადგილობრივ და ცენტრალურ მთავრობას დროულ და ადეკვატურ რეაგირებას”, – წერს ანა წერედიანი.
სვანეთში ორი ახალგაზრდას დაკარგვის შესახებ 112-შიინფორმაცია 24 ივლისს შევიდა. დაკარგული ახალგაზრდების მოსაძებნად შესაბამისი ტექნიკის, კერძოდ კი სითბური დრონების ჩართვას ითხოვენ, რომელსაც ღამის ხედვის რეჟიმი აქვს, ასევე ვერტმფრენისაც, თუმცა სამაშველო ამბობს, რომ ამინდის გამო, ვერტმფრენის გამოყენება ჯერჯერობით ვერ ხერხდება.