მესტიისა და ლენტეხის ტერიტორიაზე ორ დაკარგულ ადამიანს ეძებენ. ინფორმაციას შინაგან საქმეთა სამინისტროს საგანგებოს სიტუაციების მართვის სამსახური ავრცელებს.
ორი ადამიანის დაკარგვის შესახებ ინფორმაცია 112-ში 24 ივლისს შევიდა.
საგანგებო სიტუაციების მართვის სამსახურისინფორმაციით, მეტეოროლოგიური პირობების გამო, სამძებრო ოპერაციაში ვერტმფრენის ჩართვა ვერ ხერხდება.
“შინაგან საქმეთა სამინისტროს საგანგებოს სიტუაციების მართვის სამსახურის სახანძრო-სამაშველო ძალების თანამშრომლები, მეორე დღეა მესტიისა და ლენტეხის ტერიტორიაზე, ორი დაკარგული მოქალაქის ძებნა-შველის ოპერაციას ინტენსიურ რეჟიმში ახორციელებენ.
ძებნა-შველის ოპერაციაში საგანგებო სიტუაციების მართვის სამსახურის განსაკუთრებულ სიტუაციებზე რეაგირების, თბილისის, იმერეთისა და მესტიის სამთო სამაშველო ძალები და სამაშველო დრონები არიან ჩართულები.
სამაშველო ოპერაციაში სასაზღვრო პოლიციის ვერტმფრენის ჩართვა მეტეოროლოგიური პირობების გამო, ამ ეტაპზე ვერ ხერხდება.
საძიებო სამუშაოებში სახანძრო-სამაშველო ძალებთან ერთად ჩართულია შინაგან საქმეთა სამინისტროს ყველა შესაბამისი დანაყოფი.
მომხდართან დაკავშირებით ინფორმაცია საზოგადოებრივი უსაფრთხოების მართვის ცენტრ 112-ში 24 ივლისს შემოვიდა, რის შემდეგაც საგანგებო სიტუაციების მართვის სამსახურმა მყისიერი რეაგირება მოახდინა.” ნათქვამია ინფორმაციაში.