“ახლა ძალიან კარგი დროა ამ ისტორიის მოსაყოლად…” – რას ჰყვება მოქალაქე საქართველოს ნაკრების კაპიტნის შესახებ?

2018 ან 2019 ან რაღაც ეგეთი წელია, საბას Geo Team ახალი შექმნილი ჰქონდა და გურამ კაშიას მაისურს ათამაშებდა. რადგან ყოველთვის ჩემთვის გამორჩეული ფეხბურთელი იყო მისი თავდადების და შრომისმოყვარეობის გამო, ვიფიქრე, მოდი ვცდი-მეთქი, მაგრამ, რა თქმა უნდა, ვერ მოვიგე მაისური.

გამარჯვებულზე დაბოღმილმა დავწერე კომენტარებში (თუ სწორად მახსოვს), „მაინც მე უფრო მიყვარს”-მეთქი. გადის რამდენიმე საათი ან წუთი და მოდის ნოთიფიკაცია, გურამ კაშიამ მოგწერაო.

მწერდა, ნაკრების მაისური არ მაქვს, მაგრამ „სან ხოსეს” მაქვსო. სამწუხაროდ, მე არ ვარ საქართველოში და ჩემი მეგობარი მოგაწვდისო.

იმ მომენტში ჩემზე ბედნიერი ადამიანი არ არსებობდა და ალბათ, კაშოს იმდენი სიკეთე აქვს გაკეთებული, არც ახსოვს, როგორ გამახარა მაშინ, მაგრამ მე არასდროს დამავიწყდება და სანამ კარიერას დაამთავრებს, იმ მაისურზე ხელსაც მოვაწერინებ.

ამიტომ, კაპიტანო, ყველგან, ყოველთვის და ყველასთან დაგიცავ” – წერს მარიამ მდინარაძე.