საქართველოს ეროვნული ნაკრებისა და “ვალენსიას“ მეკარემ, გიორგი მამარდაშვილმა შესაძლოა კლუბი შეიცვალოს. ევრო 2024-ზე წარმატებული ასპარეზობის შემდეგ მისით არაერთი გუნდი დაინტერესდა.
მამარდაშვილზე ცნობილი სატრანსფერო მედია გამოცემა “footballtransfers.com”-იც ალაპარაკდა. გავრცელებული ინფორმაციით, ქართველი მეკარის შეძენა პრემიერ ლიგის გრანდებს “ჩელსისა” და “მანჩესტერ იუნაიტედს” სურთ. გამოცემის თანახმად, ამ კლუბებმა გიორგი მამარდაშვილის ტრანსფერზე ნადირობა ევროპის ჩემპიონატის შემდეგ დაიწყეს.
ცოტა ხნის წინ ცნობილი გახდა, რომ ქართველი მეკარით მიუნხენის “ბაიერნი” დაინტერესდა. გამოცემა Football Espana-ს ინფორმაციით, “ბაიერნმა“ “ვალენსიიდან“ მამარდაშვილის კონტრაქტისა და ხელფასის შესახებ დეტალები გამოითხოვა.
“მიუნხენელები გასულ ზაფხულს ახლოს იყვნენ მეკარის შეძენასთან, ახლა კი ფეხბურთელით კვლავ დაინტერესდნენ” – წერს ესპანური გამოცემა.
თავად ფეხბურთელმა განაცხადა, რომ ჯერ უნდა დაისვენოს და კლუბის შეცვლასთან დაკავშირებით გადაწყვეტილება ამ დრომდე არ მიუღია.
“ვალენსიასთან“ კონტრაქტი კიდევ სამი წელი მაკავშირებს. ჯერ უნდა დავისვენო. მომავალ გუნდთან დაკავშირებით მე, ჩემი ოჯახი და აგენტი გადაწყვეტილებას ერთად მივიღებთ. ასე რომ, ჯერ არ ვფიქრობ არაფერზე, კარგად უნდა დავისვენო და სეზონისთვის მომზადებას ახალი ენერგიით შევუდგები“ – აღნიშნა მამარდაშვილმა.
გიორგი მამარდაშვილმა ლა ლიგის 2023/24 წლების სეზონში, 38 მატჩში 40 გოლი გაუშვა, 22 შეხვედრის გარდა ყველაში კარი მშრალად შეინახა.
ევრო 2024-ზე ქართველმა გოლკიპერმა 30 სეივი შეასრულა და თითქმის გაიმეორა რუსეთის ნაკრების ყოფილი მეკარის, იგორ აკინფეევის რეკორდი, რომელმაც 2008 წლის ევროპის ჩემპიონატზე ბურთი 32-ჯერ მოგერია.