საქართველოს ნაკრების მწვრთნელად ვილი სანიოლის დარჩენა ის მთავარი თემაა, რომელზეც ფეხბურთის ქომაგები აქტიურად საუბრობენ. ჯერ-ჯერობით უცნობია გააგრძელებს თუ არა სანიოლი საქართველოში მოღვაწეობას, თუმცა ფეხბურთის ფედერაციის პრეზიდენტი განმარტავს, რომ მწვრთნელთან ხელშეკრულების გახანგრძლივებაზე საუბარი დაწყებულია. მისივე თქმით, სურვილი იმისა, რომ სანიოლი ეროვნულ ნაკრებში კვლავ დარჩეს, ორმხრივია, თუმცა გააგრძელებს თუ არა ფრანგი მწვრთნელი ნაკრების განვითარებაზე ზრუნვას, ეს ჯერ-ჯერობით უცნობია.“ძალიან დიდი ხანია, ჩვენ ვილი სანიოლთან სამომავლო გეგმებზე საუბარი დავიწყეთ. მასთან მოქმედი ხელშეკრულება მიმდინარე წლის ბოლომდე გვაქვს, თუმცა, ვილიმ ჩვენი პოზიცია იცის – გვინდა, რომ ის ჩვენთან რაც შეიძლება დიდი ხანი იყოს. ჩვენც ვიცით მისი პოზიცია – ვილისაც ძალიან დიდი სურვილი აქვს, რომ აქ იყოს. რაღაც პერიოდის შემდეგ უკვე ოფიციალურად გვეცოდინება, მომავალ წელს რა იქნება.” – თქვა ფეხბურთის ფედერაციის პრეზიდენტმა, ლევან კობიაშვილმა საქართველოს ნაკრების მწვრთნელზე, ვილი სანიოლზე საუბრის დროს.
