საქართველოს პრემიერ-მინისტრი ირაკლი კობახიძე აცხადებს, რომ ბიძინა ივანიშვილის ფონდი „ქართუს“ დაპირებული 30 მილიონი ლარი საქართველოს ეროვნულ ნაკრებს გადაეცა.
კობახიძის თქმით, „ქართული ოცნების“ ლიდერებმა ნაკრების მოთამაშეებს შეახსენეს, რომ შემდეგი თამაშიც არის დაკავშირებული ასეთ ჯილდოსთან და ეს „კიდევ უფრო მეტად შექმნის მოტივაციას“:
„კიდევ ერთხელ ვიტყვი, დამატებით მოტივაცია ფეხბურთელებს არ სჭირდებათ, ძალიან დიდია მათში ჟინი და მოგების სურვილი შემდეგ თამაშზეც. ეს ყველაფერი არის შესაძლებელი. მიუხედავად იმისა, რომ ესპანეთი არის ჩემპიონატის ერთ-ერთი ფავორიტი, ყველაფერი არის შესაძლებელი.
ბიჭებმა დაამტკიცეს, რომ ნებისმიერ მეტოქესთან შეუძლიათ თამაში. პორტუგალია არ იყო ნაკლები ესპანეთზე, შესაბამისად, 30-ში არის ყველაფერი შესაძლებელი“, – ამბობს ირაკლი კობახიძე.
ფულადი პრიზის შესახებ თავდაპირველად ინფორმაცია ნაკრების მიერ ევროპის ჩემპიონატის საგზურის მოპოვების შემდეგ გავრცელდა. ივანიშვილის „ფონდი ქართუ“ აცხადებდა, რომ ეროვნულ გუნდს ჯგუფური ეტაპიდან გასვლის შემთხვევაში 30 მილიონ ლარს გადასცემდა, შემდეგ კი, ყველა მომდევნო ეტაპზე გადასვლისთვის — დამატებით 30 მილიონ ლარს.
საქართველოს ნაკრებმა ევროპის ჩემპიონატის F ჯგუფის გადამწყვეტ, მე-3 თამაშში პორტუგალია 2-0 დაამარცხა და პლეიოფში გავიდა.
ქართველთაგან გოლები ხვიჩა კვარაცხელიამ და ჟორჟ მიქაუტაძემ (პენ.) გაიტანეს. საქართველომ ჩეხეთთან ნათამაშები ფრესა და პორტუგალიასთან მოგების წყალობით, ჯამში, 4 ქულა დააგროვა და შემდეგ ეტაპზე მე-3 ადგილით გავიდა. F ჯგუფში ჩეხეთი ჩარჩა.
ქართველი ქომაგები სადებიუტო ევროზე დაფიქსირებულ ისტორიულ შედეგს მთელი ღამის განმავლობაში ზეიმობდნენ გერმანიასა თუ საქართველოში. მეთექვსმეტედფინალში ქართველთა მეტოქე ტურნირის გამორჩეული ფავორიტი ესპანეთი იქნება. მატჩი 30 ივნისს, კვირას, 23 საათზე გაიმართება.