“თუ ვინმემ საბოლოოდ დაარწმუნა ევროპა, რომ ვართ ევროპული ერი და ვართ ევროპული ოჯახის წევრობის ღირსი, ეს არის ჩვენი ნაკრები”– ასე ეხიანება პოლიტიკოსი რომან გოცირიძე სოციალიურ ქსელში ევროპის ჩემპიონატზე ისტორულ გამარჯვებას.

“ერთი პატარა შტრიხი: შოტლანდია 12-ჯერ მონაწილეობდა ევროპისა და მსოფლიო ჩემპიონატების ჯგუფურ ეტაპზე და თორმეტჯერვე ჯგუფში ჩარჩა:))

მეორე, უკვე არასპორტული შტრიხი: თუ ვინმემ საბოლოოდ დაარწმუნა ევროპა, რომ ვართ ევროპული ერი და ვართ ევროპული ოჯახის წევრობის ღირსი, ეს არის ჩვენი ნაკრები და ევროპის ქუჩებში და სტადიონებზე მოგუგუნე და მომღერალი ათასობით ქართველი გულშემატკივარი, შემოსილი ქართული ( ევროპული) დროშით.

გერმანიის ქუჩებში ჩვენი დროშაც ფაქტორი გახდა”– წერს რომან გოცირიძე.

ცნობისთვის, 26 ივნისს ევროპის ჩემპიონატის ჯგუფური ეტაპის მესამე მატჩში საქართველომ ისტორიული გამარჯვება მოიპოვა, პორტუგალიის ნაკრები 2:0 დაამარცხა და მერვედფინალში გავიდა, სადაც ესპანეთის ნაკრებს დაუპირისპირდება. მატჩის პირველი გოლი შეხვედრის დაწყებიდან მეორე წუთზე ხვიჩა კვარაცხელიამ გაიტანა, ხოლო მეორე გოლი, მეორე ტაიმში, პენალტით გიორგი მიქაუტაძემ გაიტანა.

როგორც ცნობილია, ევროპის ჩემპიონატზე პირველი მატჩი საქართველოს ნაკრებმა 18 ივნისს, თურქეთთან გამართა და 1:3 დამარცხდა, ხოლო 22 ივნისს გამართულ მეორე მატჩში ჩეხეთის ნაკრებთან შეხვედრა ფრედ, 1:1 დაასრულა, შესაბამისად, ევროპის ჩემპიონატზე პირველი ქულა მოიპოვა. პორტუგალიასთან გამარჯვების შემდეგ კი, ეროვნულმა ნაკრებმა 4 ქულა მოიპოვა,რითიც F ჯგუფიდან გავიდა.

ევროპის ჩემპიონატის მერვედფინალში “ჯვაროსნები” ესპანეთს დაუპირისპირდება. მატჩი 30 ივნისს, თბილისის დროით 23:00 საათზე დაიწყება.

კატეგორიები

ბოლო ამბები